Chief minister Lalduhoma leh Cooperation minister PC Vanlalruata te hmaah Mizoram Milk Producers Cooperation Union Limited (MULCO) leh National Dairy Development Board (NDDB) chuan Mizorama bawnghnute tharchhuah leh sawngbawlna lam tihhmasawnna tur thawhhona thuthlung (MoU) an ziak.
Chief minister chuan he inremna hian bawnghnute tharchhuah kawngah a tanpui dawn a ni mai loa, ran vulhtu mi tam tak eizawnna leh sum thawhchhuah a tipung dawn tih a sawi.
Minister PC Vanlalruata chuan, India ram hmun hrang hranga sulhnu tha tak tak lo nei tawh NDDB nena an thawk dun thei tur chu an phur a, cooperation lamah hma an sawnpuiin, ranvulhtuten an chhawr hle dawn tih a sawi a ni
MoU ah hian Mizoram sawrkar aiawhin Cooperation commissioner & secretary Udit Rai Prakash chuan a hming a ziahhnan a, NDDB aiawhin executive director S. Rajeev chuan a hming a ziahhnan. MULCO aiawhin managing director Lalhmunliani chuan a ziahhnan a ni.
NDDB hian Ministry of Cooperation flagship scheme – White Revolution 2.0 dungzuiin Mizoram state tan Comprehensive Dairy Development Plan a siam anga, a tihlawhtling turin Mizoram Milk Producers Cooperation Union Ltd hmalakna tur a duang anga, technical lam leh thil tul tinrengah NDDB hian a thawhpui dawn a ni.
Bureau of Animal Husbandry & Statistics 2024- 2025 tarlan danin, kum 2024- 2025 chhungin hmarchhakah Mizoram-in nitin bawnghnute a tharchhuak tlem ber a, a tharchhuah zat chu 64.4 thousands kg. per day (TKgPD) a ni.
Bawnghnute ah MoU ziak
