Champhai district huamchhunga cooperative society-te hmasawnna tura thuneihna leh mawhphurna neitu sang, Champhai District Cooperative Development Committee (DCDC) chu an chairman, district bawrhsap James Lalrinchhana hoin Thawhtanni khan Champhai District Milk Producers’ Cooperative Union Limited (CHAMUL), AH & Vety Complex Champhai Vengsang hmunhma leh hmanraw neihte tlawhin an enfiah.
Chhan hrang hrang avanga hun rei tawh tak chawlhsan tawh CHAMUL hmunhma, building leh a chhunga bungrua awmte chu DCDC thukhawmin a lo rel tawh bawhzuiin enfiah a ni a. A hmunhma leh bungraw awm ang ang chu tihfai thuai ni se, electric pawhluhna, line hrang hrang inthlunzawm dan leh bawnghnute sawngbawlna khawl dinhmun chu mithiam zawkte ruaia enfiah thuai a, enchhin nise an ti. Endikna atanga a dinhmun dik tak hmuhchhuah azirin hmalak chhunzawm zel dan tur ngaihtuahho leh tum a ni.
CHAMUL hian kum 2010- 2011 atang khan primary cooperative society member-te hnen atangin bawnghnute lakhawmin ‘CHAMUL Bawnghnute’ a siam chhuak tan a. Society member atanga bawnghnute leikhawm chu hralh chhawn leh turin a siamchhuak a, Champhai leh khaw chhehvelah an hralh thin. 2014 January 23-ah pasteuriser leh packing machine a chhiat avangin kum khat chuang chawlh lailawk a ni a, 2015 November atangin lakkhawm leh a ni a, 2017 kum tirah harsatna/ buaina a awm avangin tun thlengin bawnghnute lakkhawm a ni ta lo a ni.
Bawnghnute sawngbawlna tharthawh dan tur an enfiah
