Aizawl bawrhsap Dr Lalhriatzuali Ralte chuan Thawhlehni khan Central Jail dinhmun a enfiah.
Bawrhsap hi Central Jail special superintendent Zosangliana leh medical officer Dr CT Lalruatkima ten an lo dawngsawng a. Jail-a harsatna hrang hrang leh hmalak theihna tur an sawi ho.
Central Jail hi tang 436 len theihna tura duan a nih laiin, tunah tang mi 825 an awm mek a. Hmeichhe awmna bik hi mi 96 awm theihna tur ruahman a nih laiin tunah tang 214 an awm mek bawk. Jail-a thawk zat leh tang zat atang hian indaih lohna a nasat zia hriat theih a ni a, UTP (under trial prisoner) te rang zawka an case chinfel sak zel theih dan tur te sawi a ni.
Central Jail-a awm mek zingah ND&PS Act hnuaia tang an tam ber a, hei hian ruihhlo kaihhnawiha harsatna siam an tam tih a tarlang. Hei vang hian sawrkar leh khawtlang pawhin nasa zawka hma lak a ngai tih te sawi a ni.
Jail tang chhuak, chhungte bula letna tur nei lo leh harsa zawkte awm zawmna tur leh inenkawlna (rehabilitation) kawng sawi ho a ni a. Mizoram Social Defence & Rehabilitaton Board (MSDRB) hmalakna leh scheme hrang hrang thlunzawm dante sawiin, felfai zawka duan tum a ni.
Bawrhsap-in Central Jail a tlawhnaah hian Inspector General of Prisons Zarzokimi, chief judicial magistrate Aizawl Lalrochami Ralte, judicial magistrate of first class HT Lalmawizuala, Mental Health state nodal officer Dr Robert L Khawlhring, district immunisation officer Dr Laldinpuii Ralte, MSDRB chief executive officer Lalhlupuii Sailo, SDC Aizawl R Lalrinzuali leh official dangten an tawiawm.
Bawrhsap-in Central Jail enfiah
![](https://theaizawlpost.org/wp-content/uploads/2023/02/baw-1024x768.jpeg)