Lunglei district bawrhsap R Lalthazuala chuan Inrinni khan Civil Hospital Lunglei tlawhin an dinhmun a enfiah.
Bawrhsap hi senior medical superintendent Dr Laldinmawii hoin an lo dawngsawng a. Hospital ward hrang hrang leh department /room hrang hrang fanpuiin, khawl leh hmanraw dinhmun, thawktu dinhmun leh damdawi in inrelbawlna kaihhnawih thil bakah an mamawh leh harsatnate an lo thlen. Hospital tihchangtlunna tura hma lakna kal mek leh hmabak la awmte, an hmathlirte an sawi ho bawk.
Civil Hospital Lungleiah hian tunah senior medical superintendent hoin doctor 33 an awm a. Psychiatrist tih loh chu department zawng zawngah doctor an awm kim. Psychiatry department pawh clinical psychologist hoin pangngai taka kalpui tho a ni.
Damdawi in inrelbawlna leh thawktute theihna, thiamna leh hna thawh dan phunga tehfung hrang hrang hmanga India rama hospital tha bik tehna, National Quality Assurance Standards (NQAS) certification chu kumin June 15 khan Civil Hospital Lunglei hian sawrkar laipui Ministry of Health & Family Welfare atangin a hmu a. NQAS certification dang pahnih – MusQan (naupang lam enkawlna tha bik) leh LaQshya (nau neihna hmun tha bik) certificate dawng telin, Northeast India bikah Civil Hospital Aizawl nen a ruala heti ang certificate pathum dawng thei hmasa ber a ni. Mizoramah NQAS certified facility hi pariat an awm mek.
Bawrhsap-in damdawi in dinhmun en
