Bawrhsap-in MJA kawm
Lawngtlai district bawrhsap thar H Lalhmingthanga chuan Zirtawpni khan Mizoram Journalists’ Association (MJA) Lawngtlai District member-te chu a pisaa lengah sawmin district hmasawnna atana hmalakna tur pawimawh a sawipui.
Bawrhsap chuan chanchinbumite chu sawrkar leh mipui inkara palai pawimawh tak, sawrkar ruahmanna puanzar kawnga kutke pawimawh an ni, tiin, district hmasawnna atana Lawngtlai district administration an lo thawhpui tawh thin anga tha taka thawhpui zel turin a sawm. Lawngtlai District MJA hmalakna chhuanawm tak tak a lo hriat thin thu sawiin, an hnathawh tha chu chhunzawm zel turin a chah a. District inrelbawlna chungchang leh hmabak awmte sawiin, ramin inthlanpui a hmachhawn turah leh kawng hrang hrangah district administration thawhpui a, mipui rawngbawlna leh district hmasawnna thawh kawngah finchhuah a, thurawn pe thin turin MJA a chah.
MJA Lawngtlai District hi an president Lalngheta Ralte hoin an kal a, bawrhsap hnenah hian District MJA patron a nih hriattirna lehkha an hlan nghal. District hmasawnna’n thawhpui tura an inhuam reng thu an sawi a. District MJA hnathawh dan leh hmalakna leh hmachhawp an neihte hrilhin, district administration leh District MJA thawh hona kawnga rawtna an neihte an thlen a ni.
Bawrhsap-in MJA kawm
