BBC Indian Sportswoman of the Year 2022 Weightlifter Mirabai Chanu

A tum hnihna atan India ritchawi chak Mirabai Chanu chu BBC Indian Sportswoman of the Year atan thlan leh a ni.
Kum 28 mi Chanu hi Common-wealth champion niin, kum 2021 pawh khan BBC chawimawina hi a lo dawng tawh a, he award vawihnih dawng thei hmasaber a ni.
Delhi khawpuia award ceremony hi Meitei nula hian live link hmangin a zawm a, he huna thu a sawiah Chanu chuan a chawimawina dawnin a tiphur takzet tih leh Olympic Games lo awm leh tur atan rim zawkin a inbuatsaih mek tih a sawi a, India tana medal tam zawk sualchhuah chu a tum leh duh ber a nih thu a tarlang tel.
He award dawng thei tura chhawp-chhuah sawrzim dangte chu wrestler pahnih Vinesh Phogat leh Sakshee Malikkh bakah boxer Nikhat Zareen leh badminton star PV Sindhu-te an ni.
Table tennis player Bhavina Patel chu Para Sportswoman of the Year atan thlan niin, he category hi an vawi-khat telhna a ni a, Commonwealth gold awrhtu hian award hmasa ber a chang.
Kum 36 mi Patel hian an lawmman siama BBC-in Para-sport and telh chu lawmawm a tih thu a sawi.
Hockey player hlui leh coach ni zui ta Pritam Siwach kutah Indian sports tana a thawh that avang leh player chhuanthar lo chhuak zelte tana kawngsialtu a nih avangin Lifetime Achievement award hlan a ni.
Kum 48-a upa Siwach hi hmeichhe hockey coach zinga Dronacharya Award dawng thei hmasa ber a ni bawk dawn a; he chawimawina hi kum 1985 atanga sem tan niin, India rama sports coach-te chawimawina a ni.
Boxer Nitu Ghanghas chuan Emerging Athlete of the Year a dawng ve bawk.
Kum 22 mi Ghanghas hi youth world champion tum hnih ni tawh, 2022 won Commonwealth gold awrhtu kha a ni.
BBC award sem inkhawm hi Delhi khuaa Taj Palace Hotel-ah nghah niin, Ghanghas-i kuta chawimawina hlan a nih hmain he hun chhim tura an sawm zinga mi gymnastics great Simone Biles-i video message ngaihthlak a ni a, American mihang chuan Nitu lawmpuina sawiin, Birmingham khawpuia Commonwealth Games hnehna chang tur khan Nitu chuan a thawkrim takzet tih a sawi a; Ghanghas pawh hian award a dawn rualin Biles-te lak atanga chutiang thu a dawng chu ropui a tih thu leh hmeichhe infiammite tan phurna leh thathona thlentu, hmasawnna thlen theitu tur a nih thu a sawi.
Award dangah kum 95 mi Bhag-wani Devi leh kum 106 zeta upa ni tawh Rambai-te chuan Changemaker of the Year award an dawng ve ve.
Devi hian Finland rama World Masters Athletics-ah 100m sprint gold medal awrhin, he World Masters Athletics-ah bawk hian shot put-ah bronze a dawng bawk a; Rambai ve thung hian Vadodara khuaa 2022 National Open Masters Athletics Championships 100m leh 200m intlansiakah gold medal a dawng ve ve!
He award ceremony hi Rajasthan Chief Minister Ashok Gehlot bakah India men’s national hockey team captain hlui Dilip Tirkey, President of Hockey India leh Olympic boxing champion ni bawk Vijender Singh leh India top-ranked table tennis player Manika Batra-te’n a hmunah an chhim.
BBC Indian Sportswoman of the Year hi kum 2019 atanga bul tan niin, India rama hmeichhe infiammi tha ber berte chawimawina leh hmeichhe infiammite chophurna’na buatsaih a ni.