BBC Indian Sportswoman of the Year Shooter Manu Bhaker

Olympic shooter Manu Bhaker chu BBC Indian Sportswoman of the Year for 2024 atan thlan niin, BBC lamin tuntuma Indian sports award a buatsaiha vote thlaktute hi khawvel puma BBC thlirtute an ni.
Kum 22-a upa Bhaker-i hi hian Paris-ah khan history thar siamin, Indian hmeichhe zinga Olympic Games tum khata medal pahnih la thei hmasaber a nih bakah women’s 10m air pistol-a bronze medal a awrh chiah khan Indian hmeichhe zinga shooting-a OIympic medal la thei hmasaber a ni nghal bawk.
Ni hnih hnuah bronze dang kap chhuak zui lehin, kha erawh mixed 10m air pistol-a Sarabjot Singh nena an sualtluk dun a ni thung.
Bhaker hi a hma pawhin BBC ISWOTY Emerging Athlete of the Year award hlan a lo ni tawh bawk a, tunah chawimawina hlu zawk a dawng zui leh ta a ni.
A award dawn tharlam ber a pawm thu sawi chungin Bhaker-i chuan, “Ka zin kawngah hian hniam chang leh san tum ka nei a, engpawhnise, ka hmeichhiatpuite bakah beiseina leh tum ruk sang tak tak nei infiammi leh chuti ang mangphan zawng zawngte tan phurna leh thathona ka siamsak ka beisei.
“I tum anga i la khawsak theih loh mai avang khan i zin kawng a tawp fel ta mai tihna a ni lo. I thawnthu chu nangmah ngeiin i ziak tur a ni,” tiin fuihna thu a chhakchhuak nghal.
Shooter dang Avani Lekhara pawh BBC ISWOTY Para-sportswoman of the Year award dawngtu niin, kumin BBC award chu shooter lamin an hui tlat!
Kum 23 mi Lekhara pawh hian Paralympic Games lamah hming a chher hle a, Indian hmeichhe zinga Paralympic medal pathum awrh thei awmchhun niin, Paris-ah khan gold a awrh a, Tokyo 2020 pawh bronze a hlawhchhuak bawk.
BBC-in India infiammite pual chawimawina a siam chungchangah Indian President Droupadi Murmu chuan lawmthu sawiin, “BBC Indian Sportswoman of the Year chawimawina an buatsaih chungchangah BBC team-te thiltih hian min tilawm a, he hmalakna hmang hian infiammi chungchuang bikte hlawhtlinna kan nemnghehpuiin kan hriatpui a, sport huang atan mai ni loin hmeichhe la naupang zawkte’n an duhthusam tipuitling tura an beihna kawngah huaisenna leh phurna a siamsak ngei ang,” a ti.
Archer Sheetal Devi pawh Emerging Athlete Award dawngtu a la ni cheu a, kumin chu thal kap thiamte lansarh kum niin, Indian zinga Paralympic medallist naupangber a nihna kha he chawimawina dawntirtu a ni.
Tleirawl kum 18 mi lek hian Paris Games-a bronze medal a dawn bakah 2022 Asian Para Games-ah khan gold pahnih leh silver pakhat a kap chhuak a, World Para Archery Championship lamah pawh silver a lo dawng tawh bawk.
Indian women’s cricket team-a kum 18 chhung teh meuh captain hna lo chelh tawh Mithali Raj kutah Lifetime Achievement Award hlan ni bawkin, kum 42 mi Raj hian kum 2004 atanga kum 2022 chhung kha India team a hruai a, international cricket history-a captain ni rei ber a ni nghe nghe.