Champhaiah January 8-15, 2025 chhunga Reliance Foundation Youth Sport, football inelna hmachhawn turin Aizawl champion RS School of Learning Beck’s Under 15 team te chuan tukin zing khan Aizawl an chhuahsan a, champhai an pan.
Champhaia State championship hmachhawn tur Beck’s Football Academy te hi Aizawl District inelnaa champion an ni a. Aizawl a team pariatte inelna Group League leh Final round-ah an khingpuite an hneh vek a. Match rukah goal 34 lai an thun laiin goal an chhuah miah lo va, phu takin Aizawl champion an ni.
January ni 8, Thawhlehni-a khelh tan tur RFYC Youth Sport-ah hian Under 15-ah team pali; Lunglei champion Mualchin Football Club, Kolasib champion – CC Academy, Champhai champion – Holy Mission School leh Aizawl champion – RS School of Learning Beck’s ten inelna an hmachhawn dawn a. Team palite hi home leh away in vawi hnih theuh an inkhel ang a. Vawi hnih theuh an inkhelh chhuah hnua point hmu sang ber chu State champion niin, Mizoram aiawhin an fehchhuak zui leh ang. Under 15 inelna neih a nih rual hian Under 17 Boys bakah Under 15 Girls ten inelna an nei ve dawn bawk.
Aizawl Champion RS School of Learning Becks hi Mizorama football coach hriat hlawh leh tawnhriat ngah tak Anand Gurung (Beckham-a) enkawl a niin Beck’s Academy hi Tanhril-ah a awm a. An academy a kal ten kar tluanin training mumal tak an nei thin. Becks Academy hian Relliance Naupang League an hmachhawn bakah Realiance Under 15 leh 17 an hmachhawn a. Second division team nei bawkin an inkhaidiat dan a tha hle. Realliance Naupang League-ah phei chuan an under 14 team te vawi hnih champion zawnin team dang champion an la awm lo.
Beck’s Academy hi Aizawl-ah chuan football academy tha ber ber zinga mi niin, kum bithliah inelna hrang hrangah Mizoram aiawh an awm deuh zel tawh nghe nghe. Champhaia inelna hmachhawn tur Under 15 team-a an player tam zawk hi Aizawl FC tan I League U – 15 inelna hmachhawn zui turte an ni a. Beck’s football Academy player eng emawzatin Aizawl FC tan Under 13 I League an khel zui dawn bawk.
Beck’s in champhai an pan
