Bekang tha lo um avanga taksaa harsatna nei engemawzat awm meknaah hemi kaihhnawih nia ngaih theiha naute pakhat a thih chungchangah Health & Family Welfare Food and Drugs Administration hotute chuan a hmunah an enfiah.
Kumin March 9 khan Serchhip district Khumtungah bekang tha lo um eisualin mi 67 chuan taksa lamah harsatna an tawk a. Heng zinga 45 chu Aizawla damdawi in hrang hranga enkawl tura thawn niin, 22 chuan damin damdawi in an chhuahsan tawh nia thu dawn a ni. Damdawi ina la enkawl mek zinga pahnih chu an dinhmun a la tha lutuk lo nia sawi a ni bawk.
Damdawi in panpui zingah hian naute kum 1 leh thla 9 mi, Laltlansangi d/o Ramsangmawia a tel a, bekang hi ei ve lo mah se, an chhungkua hi he bekang ei hnua taksa lama harsatna tawk zingah an tel avangin a nu hnute a hnek atanga damlo ve ta nia rin a ni a, March 15 zan dar 11.45 khan Civil Hospital Aizawlah a thi a ni.
Health department thawktute chuan bekang ‘sample’ hi March 11 khan an la a, laboratory lamah an duh anga hma la lawk thei loin vawiin – March 18 hian Selesiha Vety College laboratory-a endik tum a ni tih thu dawn a ni.
Bekang tha lo ei vanga thihna a hmunah endik
