May 16 & 17 chhung khan Mizoram Science, Technology & Innovation Council (MISTIC) leh BRIC-Institute of Bioresources and Sustainable Development (BRIC-IBSD) tangdun chuan Aizawla IBSD laboratory-ah thianghlim zawka bekang um dan leh bioresource hausakna hmanga ram hmasawnna thlen theih dan tur zirhona an buatsaih.
A ni khatnaah hian Aizawl leh a chhehvela bekang umtute leh sumdawnna atana hmang (entrepreneur) te hnenah mihring tana tangkai leh hlauhawm loh chi, bacteria bacillus subtillis atanga bekang thianghlim siam dan zirtir an ni a. A ni hnihnaah ‘Bioeconomy from Bioresources: Promoting Traditional Foods and Medicinal Plants of Mizoram for Vikshit Bharat’ tih thupui hmanga seminar neih niin, Mizoram University vice chancellor Prof Dibakar Chandra Deka chuan a hmanpui.
Hmanpuitu dang MISTIC member secretary, chief scientific officer Er H Lalsawmliana chuan Mizo chawhmeh um chi zingah bekang um, saum leh aium chu zirchian mek a ni, tiin, state pawn leh India ram pawn thlenga thawnchhuah a nghahlelhawm tih a sawi.
BRIC-IBSD, MISTIC, Mizoram University leh Bamboo Research Center atangin mithiam sawmbikten an zirtir a. Entrepreneur ho, bekang umtute, research scholar ho leh zirlai bakah sawrkar department hrang hrang atangin an chhim a ni.
Bekang um dan him leh hrisel zirtir
