Belgian court sangin Choksi-a thawn haw loh dilna hnawl

Belgian court sangin Choksi-a thawn haw loh dilna hnawl
Belgium-a court sang ber, Court of Cassation chuan India-in Punjab National Bank (PNB) sum Rs. vaibelchhe 13,000 tihchingpen thubuaia man a duh, lunghlu sumdawng lian tlan bo mek, Mehul Choksi-a’n thawn haw tura ngenna a khing letna chu a hnawl tih thuneituten an sawi.
Choksi-a hi mi a bumna hriat chhuah a nih hma lawk, January, 2018 khan Antigua & Barbuda-ah a tlanchhia a, Belgium-ah hmuh zui niin inenkawl tura awm nia rin a ni a. Mumbai-a special court-in man tura thu a pek angin India chuan Belgium hnenah hian August 27, 2024 khan thawn haw turin a ngen.
PTI zawhna chhangin Court of Cassation thupuangtu, Advocaat-generaal Henri Vanderlinden chuan, “Court of Cassation hian a dilna hi a hnawl a, Court of Appeal-in thu a lo tihtluk tawh chu a pawmpui a ni,” a ti a. Antwerp Court of Appeal-in a hmain India-in Choksi-a thawn haw tura a tihna hi a lo pawmsak tawh a ni.
Member pali awmna, Antwerp-a Court of Appeals hian November 29, 2024-a district court-in May, 2018 leh June, 2021-a Mumbai special court-in manna tur thupek a chhuah chu thutlingah pawmin Choksi-a thawn haw hi a lo phalsak tawh bawk a ni.
Court of Appeals chuan Choksi-a’n India-a thawn haw lo tura a ngen chhanpui ber, dik lo takin a chungthu rel leh tha lo taka enkawl a ni ang tih a hlauhthawnnaah ‘engmah hlauhthawn tur a awm lo’ tiin thu a rem a ni.
Court of Cassation-a a ngen nawn lehnaah hian a hmaa thutlukna siam hi ennawn niin dan angin thil kalpui a ni em, tih dan phung zawm a ni em tih leh tul dangte ena buk a ni tih ngaihtuah a ni tih Vanderlinden-a chuan thla hmasa khan a lo sawi tawh.
“Thil thar emaw, thawn haw lo tura tih theihna emaw dang hmuh engmah a awm lo,” a ti.
Central Bureau of Investigation (CBI)-in a laka thubuai siama a titu nge a ni tih an sawi dan chuan Choksi-a hian a mi malin Rs vaibelchhe 6,400 tichingpenin a nei daih niin an sawi.
India hian a chungthu ngaihtuah tura thawn haw tura a dil rual leh Choksi-a’n court-a thawn haw lo tura ngenna a thlen hnuah Delhi chuan Belgium hnenah hian a him tur thu a hrilh tawh a. A chungthu ngaihtuah chhung, lung ina a awm chhung leh a dikna humhalh leh damdawi a mamawh ang pek kawngah dan ang vekin thil tih a nih dawn thu a sawi a ni.