Beisei phak lova bul tan a, tlawm em lova him hram hram zel Belgium an tlo chhunzawm zel a, World Cup 2026 khelh mekah quarter-final an lut hial tawh. Belgium hian thawhlehni zing khan inelna thlengtu USA chu 4-1 ngawtin an hneh a, Spain hmachhawn leh turin quarter-final lut.
Quarter-final kalkawng
An golden generation an liam hnua ngaihven hlawh lutuk lova, thawm dai ta deuh riau Belgium hi Group G-ah an awm a, Iran leh Egypt te an hneh zawh loh vangin beisei an phak lo hle. Group match hnuhnung berah 5-1 ngawtin New Zealand an hneh hlauh a, Group champion ni chungin last 32 an lut. Last 32-ah Senegal hmachhawnin an tlawm teuh hle. Minute 85 thlengin si hnih an phur a, tla ngei tura ngaih an ni hman. Tlawm ngei tura ngaih an nih laiin an thochhuak leh hlauh a, 3-2 a hnehna chang letin last 16 an inhlangkai.
Inelna thlengtu USA hi group D-ah awmin bul an tan tha viau thung. Vawi hnih chak zawnin group champion an ni chiang nghal. Group match hnuhnung berah Turkey hneh lo mah se last 32-ah 2-0 in Bosnia an hneh a, Belgium hmachhawn zui leh turin last 16 an lut.
Inkhel chu le
Lumen Field a mipui 66,925 pungkhawm hmaa team hnihte an inngam tawk viau a, goal thun tumin an innawr nghal chat. Beglium in bul an tan tha viau a, tawnhriat ngah Romelu Lukaku nekchhuaka tlarhma luahtu Charles De Ketelaere chuan minute kuana lekah hmahruaina goal a thun nghal.
Hma taka goal an thun vangin phur viau mah se Belgium an phur rei lo. Minute 21-na lekah an midfielder pawimawh Amadou Onana chuan hliam na tak a tuar a, zawnchhuah a ngai. Onana hian World Cup a hmachhawn zui thei tawh dawn lova, season tharah Aston Villa tan hun eng emaw chen a khel thei dawn lo bawk. Onana inhliam in Belgium tan ch^nna lian a tling a, an muallai a kuak phah thei viau dawn.
Hma taka goal an chhuah hnuin USA an insiamtha a, na takin an khingpuite an nawr let. Minute 31-naah Malik Tillman chuan goal thunin an si phurh a sut ta nge nge. An si phurh sutna goal an thun vangin lawm viau mah se an lawm rei lo hle. An goal thun lawma mipui au thangkhawk a reh fel hman hmain Belgium in Charles De Ketelaere hmangin hma an hruai nawn lehna goal a thun zui leh zat a. Belgium hian 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun mamawh USA in tih theih an nei meuh tawh lo thung a, Belgium lam chan a ni deuh chawt tawh thung. Second half tan atanga rei lo minute 57-naah Hans Vanaken chuan an goal thumna thunin an hmahruaina a tizau. 3-1 a hma an hruai tawh bakah an game a ngheh that tawk tho vangin Belgium dinhmun a tha viau tawh.
An tualzawlah ngei si hnih ngawta an hnufual tawh vangin USA in goal thun an mamawh a, goal thun ngei tumin tan an khawh nasa hle. Phur belh huamin an khingpuite nawr thin mah se Belgium tlarhnung inrem phui tak an su pawp hleithei lo. Belgium lamin ball chan tam leh goal thun belh ngawr ngawr aia an goal neihsa venhim an ngaih pawimawh zawk vangin USA hian ball an chang tam chho a, an khel pawh a hmuhnawm chho viau.
An khingpui ten nawr nasa viau mah se Belgium lam hi an inveng thei zel a, an goal veng chungin nawr let thuta goal thun belh theihna hun remchang an zawng reng. Hun remchang zawng reng an ni bawka an tum ang ngeiin hun remchang an hmu ta nge nge. Hun pek belh minute 90+3-ah bench atanga lut Romelu Lukaku chuan an goal lina thunin an hmahruaina a tizau. 4-1 ngawta hma an hruai tawh vangin Belgium hi last 16 lut chiang tluk an ni tawh.
Goal khat tal thun belh tuma tan khawhin, a tawp rat thlengin tan khawh bawk mah se USA an hlawhtling zo tawh lova, goal an thun belh thei tawh lo. Sawilselna nasa tak karah Falorin Balogun chhawr bawk mah se hnehna an chang zo lova. Balogun ngei pawhin goal a thun thei lo tluan bawk nen Belgium lakah chiang taka tlawmin World Cup 2023 an mangtha fel. USA an tlak leh tak vangin World Cup 2026 thlengtu ram pathum; USA, Mexico leh Canada te an tla kim ta chiah a ni.
Belgium an tlo, quarter-final an lut
