Euro 2024 Group E bul an tanna inkhelah Romelu Lukaku goal hnih khung pawmsak a ni lo a, an hun tha neih dang an bawhpelh chhen bawk avangin Fifa world ranking-a pathumna luahtu Belgium chu an hneh ngawih ngawih tura ngaih Slovakia lakah an tlawm ringawt tawh a, Inrinni zanah erawh sihnih faia Romania hneh chungin an dinhmun an siamtha.
Goal khung chunga captain Kevin de Bruyne lansarh lehna inkhelah hian tan atanga second 73-naah Youri Tielemans chuan hmahruaina goal khung er zawkin, Belgium hian an hmahruaina belhchhah turin hun remchang dang an hmu sek a, mahse, hun tawp hnaih lama De Bruyne goal khat khung belh bak goal lawm tur dang nei loin 2-0 hnehna nen Cologne inkhel an zo a, ti hian, an group-a team dang pathum Ukraine, Slovakia leh Romania-te nen point thum theuh an nei a, knock out stage lut tur a la chiang lo.
Belgium chak ve ta nge nge
