Belgium-Sweden game thulh laia tlang Austria
Azerbaijan rama 1-0 hnehna changin Austria chuan Euro 2024 khel tura an mamawh point an tlin ve ta a; Thawhtannia an chakna goal hlu bik goal awmchhun kha second half penalty atanga substitute Marcel Sabitzer chhuihluh niin, Rahil Mammadov-a handball hrin-chhuah a ni a; an mikhualna atanga point thum an hlawhchhuah hmangin Germany ramah khawmualpui huap tournament pui an khel thei dawn.
Hetih lai hian Brussels khawpuia Swedish mi pahnih kahhlum an nih avangin Thawhtanni inkhel danga Brussels-a Belgium leh Sweden match chu halftime-ah tihtawp hlen niin, Swede-ho tan Euro 2024 khelh phakna kawng a ping a, kum 28 chhunga a vawikhatna atan European Cham-pionship-ah an inlan dawn ta lo a ni.
Tualchhung media tarlan danin, Swedish supporter pahnih chu stadium pawn, Brussels khawpui chhung siah kahhlum an ni a; social media lamah tunge a nih la tihchian lo mipa pakhat chuan Islamic State mi leh sa a nih thu leh pawikhawihna pawh a tih a nih thu a puang a; Belgium pawhin firfiak chetnaah an chhiar nghal a, firfiaka chetna laka inralrinna level sangber an tichhuak zui ve nghal.
Brussels khelmuala Belgium leh Sweden-te Group F game kha half-time-ah 1-1-in a zo phawt a, second half-a chhunzawm leh tur an nih laiin khelmual pawn lamah inthahna a thleng a, Swedes lam ngenna avangin game khelh chhunzawm a ni ta lo a, Sweden an tlak phah rualin an group inkhel danga hnehna chang Austria an tlang phah ta a ni.
He match-ah hian Viktor Gyokeres chuan Sweden hmahruaina goal khungin, Romelu Lukaku chuan penalty atangin Belgium siphurh a sut a, 1-1-in an tawp hlen ta a ni.
Belgium hi nakkum tournament khel tura tling chiang tawh niin, Sweden erawh nakkum Germany ramah kan hmu ve dawn ta lo a ni.
Group J lamah Slovakia chuan beiseina nung nei turin Luxembourg lakah 1-0 hnehna an sualchhuak leh a, a zawna vawithum Euros khelh an tumna kawngah hma an sawn leh hret a; Thawhtanni zana an chakna goal awmchhun kha hun tawp hma minute 13 la awma David Duris tihluh a ni.
Kha hnehna avang khan khelh hnih la awmah pahnihna Slovakia leh pathumna Luxembourg chu point ngain an inthlau ta a ni.
An group inkhel dangah Gylfi Sigurdsson chuan goal hnih khungin table-a palina luahtu Iceland chuan sili faiin Liechtenstein an sawp ve bawk.
Belgium-Sweden game thulh laia tlang Austria
