May 4-a West Bengal assembly inthlan result puan a nih khan kum 15 chhung zet an state-a rorelna fawng chelhtu, Trinamool Congress (TMC) chuan member 294 awmna rorelna inah seat 80 chauh an la a. Chiang taka an chak loh hnuah tun hnaiah party chhunga inrem lohna lian tak awm zuiin Mamata Banerjee-i kaihhruai party tan hian inthlana chak loh chu buaina intanna ang chauh a ni mek.
Kar liam ta khan party MLA 58 chu helin Bengal-a eptu party lian ber nih an tum thu an sawi a, hei hian party chu a then mek a. Zirtawpni khan Mamata-i chenna ina thutkhawm kohvah hel ve lo MLA zinga pariat chauh an tel zui.
Party chief ina kalte hi Bina Mondal, Ashima Patra, Madan Mitra, Kunal Ghosh, Firhad Hakim, Sobhandeb Chattopadhyay, Biman Banerjee leh Ashok Kumar Deb te an nih thu news agency ANI chuan a tar lang.
MP pawh paruk chauh – Dola Sen, Mala Roy, Kalyan Banerjee, Abhishek Banerjee, Derek O’Brien leh Sudip Bandyopadhyay te an tel bawk a. TMC hian Lok Sabha-ah MP 28 lai an nei a, Rajya Sabha-ah MP 13 an nei bawk.
TMC MLA tam zawk hel mekna hi tun hnaia party kal zawnga a chet avanga an hnawh chhuah, Ritabrata Banerjee-a kaihhruai an ni a. Nilaini khan assembly speaker hmuin Leader of Opposition (LoP) atana ruat a nih thu a puang a, hei hian party chu buaina khiarh takah a hruai lut.
Tun hi Mamata-i’n Congress nena inthena party a din atanga kum 30 chhunga an inthenna hmasa ber a ni.
TMC-a Muslim MLA 34 zinga a chanve vel chuan zirlai hruaitu hlui, kum 2017-a Communist Party of India (Marxist) atanga hnawh chhuah lo ni tawh, kum 2024-a TMC-in Rajya Sabha MP atana an dah, Ritabrata-a an thlawp mek a ni.
Party pui atanga hel mekte hian Mamata-i chu an ‘principal adviser’ ni turin an ngen dawn tih an sawi a; mahse, a vahpa, party national general secretary Abhishek-a nen erawh inzawmna an nei dawn lo tih an sawi a. Ani hi kum 2016 atanga an party-a thu ber dawttu ni tan a ni.
“TMC Legislative Party hi MLA 58 awmna a ni a, TMC symbol hmangin hnehna an chang a, tunah chuan assembly-ah hian TMC tak tak kan ni,” tiin Ritabrata-a chuan a sawi.
Speaker a kawm zawhah thuthar lakhawmtute a kawmnaah pawh, “Kan thu sawi hi speaker-in a pawm,” a ti.
TMC hian West Bengal assembly speaker-in Ritabrata-a LoP atana a ruat chungchangah dan anga hmalak a tum a, party MP Kalyan Banerjee chuan he thutlukna hi ‘dan bawhchhiatna’ tiin a sawi.
“Speaker-in LoP a ruat hi dan kalh a ni tih kan pawm a, hei hi Thawhtanni hian court-ah kan kalpui dawn a, high court-ah petition kan thehlut dawn a ni,” tiin a sawi a. BJP chu TMC worker-te ‘that’ leh thu buai dik lova puha thehlutah a puh bawk.
Zirtawpnia Kolkata-a Kalighat-a a chenna inah party hruaitu leh chief minister hlui, Mamata-i hova an thutkhawm zawhah Kalyan-a chuan, “Khawlaiah kan bei ang a, court-ah pawh kan bei zel ang,” a ti.
Bengal-a TMC buaina hi assembly inthlana an tlawmna leh inrelbawlna sawiselna atanga intan a ni a. May thlaa BJP laka an tlawma Chief Minister Suvendu Adhikari-a kaihhruai BJP sorkar a din hnuah TMC hruaitu tam tak chuan party kalphung, inrelbawlna leh thuneihna hman khawloh dante chu sawisel tan a ni.
Party chhungah phir awm angin thawm a awm zui a. TMC MLA 80 tling thar zinga tam tak (hel lam) chuan an hruaitu lawk tak, Abhishek Banerjee (Mamata-i vahpa) chu thuneihna hmang sualah an puh a. Buaina a lian tial tial a, June 3, 2026 khan TMC MLA tam zawk (58 vel) thlawpna hmuin Ritabrata-a chu West Bengal Assembly-ah LoP atan speaker-in a pawm ta hial a ni.
Helte hian Mamata-i chu an zah em em rualin tunah chuan thurawn petu (advisor) ang chauhva awm turin an duh tawh a, party kalphung thar an phut a ni.
Helna thleng danchah an tumin TMC hian Nilaini khan West Bengal-a an party committee leh frontal organisation an thiat vek a. Party dinhmun enfiah leh siam tha tura hma lak an tum.
MLA helte hian Mamata-i kaihhruai TMC hi an sorkar lohna a la rei loh rualin inthlana an tlawm chian em avang leh chhungkaw thuneihna (Abhishek-a lam) an duh lohna avangin a tam zawk an hel a, party a tithen mek a, an dinhmun a derthawng mek a ni.
TMC MLA helte hi MLA 80 an neih hmun thuma thena hmun khat an tlin miau avangin dan angin tlinna party phatsan an ni thei lo.
Bengal-a chak lo TMC chhungkua a buai zui mek zel
