Bengaluru-a contract ziak thar Tluanga

Bengaluru-a contract ziak thar Tluanga
Bengaluru FC thuchhuah chuan an kianga kum thum dang khelh chhunzawm turin Mizo midfielder Lalremtluanga Fanai chu contract thar an ziahpui tih an nemnghet.
Indian Super League (ISL) club Blues tarlan zel danin, Tluanga hi kum 2027-28 season tawp thleng an kawl chhunzawm dawn a; Mizo tlangval kum 20 mi hi Spanish tactician Gerard Zaragoza chuan kawl zui zel tlakah a ngai a, kum 2020 daih tawha he club a zawm hnu khan midfield-ah hma a sawn zel a, season liamta ISL lamah mittlung taka a inlan leh bawk avangin season tharah rinrawl atan hman a tum niin a lang!
Inremna thar a ziah hnuah Mizo player Tluanga chuan ISL official website kaltlangin contract thar ziah chungchang a tarchhuak a:
“Bengaluru FC-a ka khel chhunzawm leh thei tur hi ka hlim takzet a ni.
“He club hian rawlthar mai ka nih laiin min senglut a, tunhnai season hnuhnung liamta pali kaltlang khan hma ka sawn a, ka lo puitling ve ta viau mai.
“Ka kiang hnaia coach leh player-te hian min thlawp tha em em a, ka tan he hmun tluka hmasawn leh tanlen zelna tur hmun tha leh fuh hi khawiah mah awm chuangin ka hre lo.
“He football club vuan chung ngei hian hriatreng tur duhawm zawk sualchhuah zel ka tum dawn a ni,” tiin.
South Indian club tan ISL lamah a chetha thawkhat bawk a, India U23 coach Naushad Moosa pawhin 29-member probable squad a tarchhuahah Lalremtluanga Fanai hi langin, midfielder dang Lalrinliana Hnamte pawh squad luah tura koh zingah a tel bawk.