Bengaluru-a innek buaina thlengah police commissioner suspend

Bengaluru-a innek buaina thlengah police commissioner suspend
Karnataka Chief Minister Siddaramaiah chuan an khawpui, Bengaluru-a Nilainia mihring innek buaina thlenga mi 11 an thih chungchanga BJP-in an beih nasat viau laiin a sorkar chuan police officer-te an hrem (suspend) thu a sawi.
Police commissioner leh a deputy chu an hna atanga suspend an ni tih Ningani tlaia thuthar lakhawmtute a kawmnaah a sawi a. A dawt leha tuar thei chu Royal Challengers Bangalore (RCB), Karnataka State Cricket Association leh an publicist DNA Entertainment an nih thu a sawi bawk.
RCB hian Indian Premier League (IPL)-a an champion lawmna hun hman tur hi police-in inbuatsaihna hun an neih theih nan nghak hret tura an ngenna chu an duh lo nia sawi a ni.
State sorkara Criminal Investigation Department chuan ram pum barakhaihtu thil thleng hi an chhui mek zel tih chief minister chuan a sawi a. A mi malin high court judge chawl tawh, Justice Michael Cunha-a awmna commission chu chhui turin a lo ti tawh bawk.
Kum 18 an nghah hnua a vawi khat nana IPL-a RCB an champion hi an state pumah an lawm a, M. Chinnaswamy Stadium-a a lawmna hun hman turah pawh hian kal tum an tam hle a. Khelmuala luh tuma mipui inhawr khawmah chhiatna thleng zuiin mi 11 an thi a, mi dang 47-in hliam an tuar a ni.
State sorkar hi mipui tam tak pungkhawm an dawnsawn danah hlawhchhama puhin beih an tawk nasa hle a. Hetih lai hian chhui tawhna chinah chuan sorkar hian he hun hman hi chawpchilh taka ruahman niin RCB pawh hian X-ah thil thlen ni vek hian an tar lang chauh.
RCB-in an tar lan dan chuan ‘Victory Parade’ an tih hi tlai dar 05:00-ah tanin Vidhana Soudha atanga khelmual thleng kawng zawh phawtin, khelmual chhungah a lawmna hun hman turin an ti a. A thlawna luh theihna link pawh an dah tel a, ‘lut thei chin awm’ tia dahin fan-te pawh police kaihhruaina zawm turin an ngen.
A tak takah erawh mi nuai tel pungkhawm awmin police-in an veng hneh lo va, khelmualah hian mi nuai riat vel zet an lut hial nia sawi a ni.
Vidhan Soudha-ah hian chief minister, a deputy leh hruaitu dangte pawh an tel a, hetah hi chuan venhimna a la khauh hle a; mahse, a hnu zel leh khelmualah chuan mipui thunun thei khawpa tam an awm lo a ni.
Police chuan RCB, Karnataka State Cricket Association leh event management firm DNA lakah thubuai an ziak lut tawh.
Karnataka High Court pawh state sorkar chu he thil thleng report pe turin a ti a, sorkar hi a thlen chhan leh ven thei a ni em tihte pawh court hian a zawt a. Nakin zelah a thlen tawh lohna tura invenna ruahmanna siam turin a ti bawk.