Argentina leh Inter Miami forward Lionel Messi, France leh Paris St-Germain forward Kylian Mbappe-te bakah Norway leh Manchester City striker Erling Haaland-te chu FIFA 2023 Best Men’s Player award dawng thei tura khalhfal niin, men’s Ballon d’Or thlannaa ipawt na ber Argentine leh Norwegian-te bawk kha tuntum pawh hian inpawt na leh ber tura ngaih an ni.
Haaland hian Manchester City thuam a inbel hnuah trophy lian pathum lakpui tawhin, chu’ngte chu season liamta maia an sualchhuah Champions League, English Premier League leh FA Cup-te kha niin, chuti fakaua Etihad club tana thawhhlawk chu Ballon d’Or thlannaah pawh khan Argentina captain hmakhalh zawk awma ngaitu an thahnem hle a, tuntum FIFA Best Player award dawng tur thlannaa finalist pathum thurchhuahte zingah pawh hian awm bera ngaitu an thahnem leh viau niin a lang.
Nikuma he award dawngtu Messi ve thungin 2022 award a hlawhchhuah theihna chhan bulpuite kha Qatar ram World Cup-a Argentina a champion-pui vang a nih piahlamah Paris St Germain chu Ligue 1 title a lakpui a, Major League Soccer team Inter Miami panin a inpuchhuak zui ta a nih kha.
Ningania shortlist pathum tarchhuahte kha a tira player 12 an thlanchhuahte atanga thlitfim niin, men’s award bik hi men’s 2022 World Cup final zawh tuk chiah kum 2022 December ni 19 atanga kumin August ni 20 chhunga an khelh dan atanga teh a ni a; national team coach leh captain-te bakah journalist leh fan-te chu vote neitu an ni.
Ningani vek khan women’s best player shortlist pawh tarchhuah ve nghal niin, an zinga pahnih chu 2023 World Cup champion Spain player ve ve Aitana Bonmati leh Jennifer Hermoso niin, Colombia nula Linda Caicedo a tel bawk.
Barcelona leh Spain mid-fielder Bonmati hi kum 18-a upa niin, Colombia leh Real Madrid forward Caicedo bakah Spain leh Pachuca forward Her-moso-te nen an pathum hian player 16 an thlanchhuah atanga award dawng thei tura an vawrchhuah lehte an ni.
Women’s award hi nikum August ni 1 atanga kumin August ni 20 chhunga an khelh dan atangin buk a ni dawn a; mipa ang lo takin hmeichhia bikah hi chuan 2023 World Cup-a an chet dan entel a ni ang.
Best goal of the year hnena an hlan thin Puskas award dawng thei tura thlanchhuahte chu – Julio Enciso, Guilherme Madruga leh Nuno Santos niin, coach tha ber atana buk tur pathumte chu Sarina Wiegman, Emma Hayes leh Pep Guar-diola-te an ni a; goalkeeping prize dawng thei tur nominee-te chu Mary Earps leh Ederson-te an ni.
2023 Fifa Best award-te hi kumthar January ni 15 khian London khuaah puan leh semchhuah a ni ang.
Best Fifa Awards 2023 nominee an puang
