Bethlehem Vengthlang hnehtu Luangmual nulate
R. Dengthuama Indoor Stadium, Mualpui Tata SK 712 Pro Volleyball League khelh mek hmeichhe inelnaah Inrinni tlai khan Luangmual chuan 25-22, 26-24, 25-14 (3-0)-in Bethlehem Vengthlang an hneh a, D3 Business player of the match atan Nipa Barad (Luangmual) thlan a ni.
Luangmualin Pro Volleyball League an khelh hmasak berah title chuh phak an nihzia chiang zawkin an lantir thar leh a, champion lai Bethlehem Vengthlang lakah set thum an la tlang nghal.
Haryana tleirawl Nipa Barad chuan Luangmual tan vawi hnih a khelhnaah point 31 hmuin tum kua a hloh a, a hma ang bawkin D3 Business player of the match lawmman dawng lehin, Luangmual a chak zawnpui bawk a; Lalmuanpuii’n point 16 hmuin Hmingthazuali’n vawi ruk a vaw tla a, tum hnih ve ve an tisual.
Hmeichhe team paruk inel zingah Mizoram pawn atanga player lalut awmchhun Luangmualin a hmain 3-1-in Power an hneh tawh a, semi-final lut tur dinhmun thaah inhungin, an khelh tawh chinah an bitumte an thunun hneh hle a ni.
Bethlehem Vengthlang tan nikum Pro Volleyball-a player tha ber Elisian Medai chuan point 17 thawkchhuakin point ruk a hloh a; amah thlawp tur danglamna siam thei player dang an neih that loh avangin an khel a mar zo lo.
Vawi thum an khelh tawhah Bung-kawn hneh mah se Bethlehem Vengthlangin title cho phak team pahnih hmachhawn tawhin an el phak lo ve ve. Luangmual laka an tlawm hmain tun season-a chetha Kanan an hneh lo tawh a, hma lam pana insiamtha thei turin league khelh hnih an la nei.
Luangmualin vawi thum chak zawn tumin June 14, Nilaini tlaiah Bungkawn an khelhpui dawn a; June ni 13, Thawhlehni tlaiah Bethlehem Vengthlangin semi-final an beiseina tihnun tumin Durtlang an hmachhawn ve thung dawn a ni.
Mipa
Inrinni zanah set hmasa ber hloh chungin Hunthar an insiamtha a; set thum la zawnin, league kal mekah vawi hnih khel tawhin an chak zawn.
Hunthar hian Durtlang North lakah 28-30, 25-19, 25-23, 25-22 (3-1) hnehna changin, D3 Business player of the match atan Laldensanga (Hunthar) thlan a ni.
Kum 2017 leh 2018 champion Hunthar tan Laldensanga leh Lalnunfela’n felfai takin an khel a, hun pawimawhah Gagandeep Singh a rin tlakin, a tangkai hle bawk.
Tun season Pro Division inelna vawi hnih awm tawhah Hunthar an champion ve ve a; season kharna leh Mizoram inelna sang berah champion tura rin hlawh ber ni mekin, an hlawhtling a nih chuan trophy pathum nen kum kharin a vawi thumnan Pro Volley-ball-ah an champion dawn bawk a ni.
TNT lakah set la lovin champion lai Durtlang North an tlawm tawh a, a hma aia el thamin khel mah se an tlo tawk lo a, boruak sangah hriam leh zuala inlan thei turin puitling leh paukhauh zawka khelh theih an mamawh.
Durtlang North tana a khelh hmasak berah Anup D Costa chuan beisei a pha lo hle na a, tun dinhmuna team tha leh nghet ber Hunthar lakah langsar takin a khel a; Johan Vanneihtluanga, Fabian Lallung-hnema leh Vanlaltanpuia’n an khelh hmasak aiin mimalin hma an sawn bawk. Chutih laiin vawi hnih an khelh tawha an tlawm zawn avangin khelh thum an la neihah semi-final lut thei turin an hmabak a hautak dawn.
June ni 13, Thawhlehni zanah chak ngei ngei mamawh chungin Durtlang North-in Chhinga Veng Spikers an khelhpui leh dawn a; June ni 17, Ningani zanah Huntharin kai thar Tuipuiral an tum ang.
Bethlehem Vengthlang hnehtu Luangmual nulate
