Beyonce-i’n country music genre a luhchilh tanna hla thar “Texas Hold ‘Em” chu Billboard Hot 100 chart-ah a No.1 a, he chart-a kar hnih a No.1-na a ni ta. Hetihrual hian SZA ‘Saturn’ pawh chart top 10-ah a rawn invawrh kai ve nghal bawk e.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni..
“Texas Hold ‘Em” hian kar khat chhungin radio airplay-ah ngaithlatu maktaduai 27.6 a la nei thei a, stream maktaduai 25.5 leh sales 22,000 a tling bawk a, hei hi Hot 100 chart-ah a No.1 pui leh ta a ni.
Ye (Kanye West tih thin kha) leh Ty Dolla Sign te hla hit ‘Carnival’ featuring Rich the Kid leh Playboi Carti chu No.4 atangin No.2 a kai thar a, chart No.1 hlui Jack Harlow “Lovin on Me” chu No.2 atangin No.3-ah a tawlh am Benson Boone “Beautiful Things’ chu No.5 atangin No.4-ah a insawn leh hret a, Teddy Swims “Lose Control” chu No.3 atangin No.5-ah a tawlh ve ta bawk.
SZA hla thar ‘Saturn’ chu stream maktaduai 25, leh sales 2,000 neiin, radio airplay-ah ngaithlatu 9,60,000 nei bawkin No.6-ah a debut a, SZA hla Hot 100 chart top 10-a lang thei 10-na a ni a, tunkar chart-ah hian a hla dang ‘Snooze’ chu No.6 atangin No.9-ah a tawlh ve thung.
Chart No.1 hlui Zach Bryan “I Remember Everything” featuring Kacey Musgraves chu No.9 atangin No.7-ah a insawn a, chart No.3 te pawh lo ni tawh Tate McRae ‘Greedy’ chu No.8 a ni a, chart No.1 hlui Taylor Swift ‘Cruel Summer’ cu No.7 atangin No.10-ah a ve ta bawk.
Beyonce “Texas Hold ‘Em” a Hot ber
