Controversial theory Hindu group tena ‘Love Jihad’ tia an sawi hmangin Muslim mipate chuan Hindu hmeichhiate chu nupuiah neiin Muslim-ah an inleh tir thin tih chu kum tam India ramah thehdarh a ni chungin finfiahna tak tak a awm lo thung.
Tunah erawh theory dang thehdarh leh mek niin Hindu mipa ten Muslim hmeichhiate thlem thluk an tum tih chu online lamah a viral hle a, hei hi ‘Bhagwa Love Trap’ tih a ni thung a, hei pawh finfiahna a dawrawm hle chungin buaina a siam nasa nghal hle thung.
Northern India lama Muslim hmeichhe pakhat Maryam chu he thil hmanga dawta puhna tawngtu niin online ah amah nasa taka tawngkam cheh tak taka beihna a dawn hnem thu a sawi a.
A mimal nun tam tak online hmanga pholan niin Hindu mipate nena thla an lak hona chu social media-ah thehdarh niin interfaith relationship a kalpui tiin an bei a ni. Chungte chu dawt vek a ni thung si.
A thlalakpuite chu a thiante niin, “Chung ka thian mipate chu mutpuiah min chhuah a. Ka nu leh pate thlengin beih an tawh phah a ni,” tiin Maryam chuan a sawi.
Sakhaw inang lo inneih chu Indian family tam tak conservative burah chuan thil thianglo tluka ngaih a la ni reng a.
Amah beihna tam tak te account te theih tawpa a chhui chian hnuah dawta hmanga “Bhagwa Love Trap” hmanga amah beitute chu Muslim mipate ni ngeiin a hre bawk.
“Bhagwa” hi saffron tihna niin he rawng hi Hindutva nena inzawmna nei a ni a. Hindutva ideology chu extreme rightwing Hindu nationalism a ni a. “Bhagwa” tih chu Hindutva nena sawi zawm leh sawina a ni.
“Bhagwa Love Trap” theory ang chuan mipa Hindutva chawi san duhtute chuan Muslim hmeichhiate thlem thluk an tum a, Muslim atanga lakhran an tum a ni tih a ni. He idea hi Muslim mipate kalpui nia ngaih niin a tak taka a thlen an hlauh vang a ni tite pawha sawi a ni.
A lar sawt hle bawk a, kumin March thla atangin tum 200,000 chuang sawi lan a ni tawh a, a langsar hle tawh tih a ni bawk.
May thla dah tawh khan Madhya Pradesh-ah video pakhat medical student Muslim hmeichhia leh Hindu mipa ten an university scooter-a chuang duna an pan lai thehdarh a ni a.
Muslim mipa rual ten kal hualin hmeichhia chu an sakhua tihming chhia tiin an zilh lai tihlan a ni a. “Tumahin Islam i tih mualpho kan remti dawn lo,” tiin an zinga pakhat a au a, a thenin Hindu mipa chu an bei bawk.
“Love jihad” phei chu a finfiahna awm hauh si lovin India rama politics lama inbeihna thlentirtu a ni hial a. BJP te phei chuan sawi berah nei hialin an au chhuahpui a ni.
“Bhagwa Love Trap” pawh social media-ah anonymous accounts atanga irhchhuahtir a ni chungin Muslim leader langsar tak tak te chuan an tipung nasa a ni.
Uttar Pradesh Chief Minister Yogi Adityanath phei chuan kum 2007 daih tawh khan politcal rally a neihnaah Muslim-in Hindu hmeichhia pakhat a neih chuan ‘Muslim hmeichhia za kan nei tur a ni’ tiin a sawi hial tawh.
“Love jihad chuan political backing a nei tha” tiin Fatima Khan, Bhagwa Love Trap tih ziak lang hmasa journalist chuan a sawi a, India ruling party ten an thlawp a ti. “Chutih lai chuan Bhagwa Love Trap erawh conspiracy theory ang a ni a, political backing a nei lo,” tiin a sawi.
India ram zau takah inhnialna kawng hrang hrang a awm laiin chungte chu politics thila lakluh a ni deuh zel bawk a. India ramah sakhuana avanga inlakhranna leh inbeihna chu nasa zual zelin online hmanga inbeihnate pawh a takah a inchhawm chhuak ta deuh zel bawk.
Maryam pawh dawt hmanga beih a tawhah a message dawn tam tak chuan awm ngaihna hre lova a siam thu a sawi a. “A tum khat nan kan vengah pawh him lova inhriatna ka nei hial a ni. Pawn chhuah pawh ka ngam ta meuh lo,” tiin a sawi.
‘Bhagwa Love Trap’ in harsatna siam nasa
