Bhambri US Open beiseina a tawp fel ta
New York major tournament-a India innghahna hnuhnung Yuki Bhambri leh a kawppui Michael Venus-te chuan US Open men’s doubles semi-final an paltlang zo ta lo a, US dollar 2,50,000 lek an insem a ngai dawn ta!
Grand Slam tournament-a a luh thuk ber tumah Bhambri leh Venus tangdun hi 7-6(2), 6-7(5), 4-6-in experienced sixth seed British pair Neal Skupski leh Joe Salisbury lakah tlawm mah se kum 33 mi Delhi player hian Indian tennis-ah history thar a ziak ta tho a, Open era-ah Leander Paes, Mahesh Bhupathi leh Rohan Bopanna-te hnungzuia Indian mipate zinga Grand Slam doubles semi-final khel pha palina chiah a ni.
Indian-New Zealand pair hi Flushing Meadows-ah beiseiawm takin an inlan a, last four an thlenna kawngah an aia seeded sang an hneh nawlh nawlh a; chu’ng zingah chuan fourth seeds Germans Tim Putz/Kevin Krawietz a knock out bakah 11th seeds Rajeev Ram leh Nikola Mektic an hnehte kha New York tournament an ngaihtuahlet changa an tuipui tur zinga mi a ni ngei ang!
India leh New Zealand tlangval inkawpin an ngam loh Salisbury leh Skupski khan British history siam an tum dawn a, vawiin final-a Spain mi Marcel Granollers leh Argentina player Horacio Zeballos inkawp an hneh chuan kum 1903 hnu lama British pair zinga US Open men’s doubles title la thei hmasaber an ni ang.
Flushing Meadows-a title la thei all-British pair hnuhnungber chu Laurence leh Reginald Doherty-te kha an ni.
Sixth seeds Salisbury leh Skupski-te hi tun season tan rual khan an inkawp ve tan chiah a; kumin French Open final lutin, vawiin US Open final-a an tum tur veteran pahnih tangdun Granollers leh Zeballos bawk hi Paris major final-ah khan an hneh lo a, tun hi Briton pahnih inkawpin final lut chunga Grand Slam title an beisei vawi hnihna tur a ni.
Joe Salisbury hian a hmaa a kawppui thin Rajeev Ram nen khan US Open men’s doubles title hi vawi thum a lo la zawn tawh a, a chipui nen a tum khatna atan New York title an beisei mek.
Mipa doubles semi-final lehlamah Marcel Granollers leh Horacio Zeballos tangdun chuan 6-3 3-6 6-1-in American pair Robert Cash leh JJ Tracy an hneh.
Bhambri US Open beiseina a tawp fel ta
