Biak in chhunga inkhel thin TNT kechheh la buai lo

Biak in chhunga inkhel thin TNT kechheh la buai lo
Mizorama volleyball team hlawhtling Thutak Nunpuitu Team-in an la puitlin loh trophy lak tumin kawng dik an zawh mek a, Thawhtanni zan Tata SK 712 Pro Volleyball League-ah 3-1-in Tuichangral an hneh.
He inkhelah hian D3 Business Player of the Match atan Vanlaltanchhana (TNT) thlan niin, D3 Business Fan’s of the Night chu Joel Zohmingthanga (TNT) a ni ve thung.
R. Dengthuama Indoor Stadium, Mualpuiah set hmasa ber hloh mah se ropui takin an kir leh a, Vanlaltanchhana (Valbuanga) chuan vawi nga tisual chungin point 31 a hmu a, 28-30, 25-15, 25-18, 29-27-in TNT an chak.
Nikum khan a vawihnihna’n Pro Volleyball final khelin, a hma ang bawkin harsatna an tawk a, Durtlang North an ngam lo. TNT-in inrintawkna sang zawk nen kuminah bul an tan a, league an khelh hmasak berah Durtlang North laka an tlawmna an chhanglet thei nghal.
El tham Tuichangral hmaah team fei leh nghet, thawhhona nei tha an nihzia lantirin an khelhpuite aiin ho taka point paih an nei tlem a, chu chu an hmasawnna leh danglamna a ni zel.
Set khatna inchuhin vawi nga an deuce hnuah 29-28-in TNT an hniam a, D3 Business Player of the Match lawmman dawngtu Valbuanga’n vaw sualin kum 2018-a final lut Tuichangral an tlang.
An boruak a hniam laiin TNT zawkin inkhel an tidanglam zui a, Kawnpui tlangval Valbuanga’n team fuihphurin harsa lo takin set an la zawn. Net bula lehlam hlap dangtu ber Zosangzuala’n a hlutna a lantir bawk a, an inkhelh chhungin point khat chiah hlohin 13 a thawkchhuak.
Vuak tlak an harsat avanga an tlakhniam hnuah Tuichangral insiamthar ve lehin, Vinod Khatkar chuan a hlap tla a, 24-23-in hma an hruai. Set lina la thei turin Khawhai spiker Saidingpuia Sailo chuan hun tha a nei a, line pawnah a vaw chhuak.
Boruak sosang tak hnuaiah setter tawnhriat nei Lalliankima’n chiai lo takin inkhel a thunun a, 27-27 a nih hnuah Laldinchhunga’n vawi hnih a vaw tla zawn. Set khatnaa an chetsual tawhna siamtha nghalin table chung berah TNT an inhlangkai.
TNT tan Dinchhunga’n vawi 14 vaw tlain point ruk a hloh a, Sadraka Fanai chuan 12 hmuin tum thum a tisual ve thung. Tuichangral innghahna Vinod chuan point 27 thawkchhuak mah se 14 a hloh a, Hunthar an hneh loh tuma hliam vanga lakchhuah ngai Saitea’n tum 20 hlap tlain 12 a paih bawk a ni.
Biak in chhunga inkhel mai thin TNT-in rawngbawlna peng khata an hman mek volleyball-ah sulhnu an ngah hle laiin, trophy an dah khawmnaah Mizoram inelna sang ber Pro Volleyball a la tel ve lo.
Mizo hlanga champion hmasa ber nih tumin an bei mek a, Nilaini zanah rin hlawh zawk ni chungin kai thar Tuipuiral nen an inkhel ang a; a tuk zanah Tuichangralin anni ang bawkah an khelh hmasak vawi hniha tlawm ve ve Durtlang North an hmachhawn dawn a ni.
Bungkawn nulate’n last four hnaih zel
Thawhtanni tlaiah 3-2-a Power Depart-ment Sporting Club hnehin Bungkawn chuan semi-final luh theihna kawng an zawh dik zel a, Tata SK 712 Pro Volleyball League an khelh hnuhnun vawi hnihah an chak zawn.
R. Dengthuama Indoor Stadium, Mual-puiah D3 Business Player of the Match lawmman dawngtu Bungkawn spiker F. Lalparmawii’n point 45 hmuin 11 a hloh a, 25-10, 21-25, 25-17, 25-27, 15-9-in team a chakpui.
An khelh hmasak berah nikum final ang bawkin Bethlehem Vengthlang lakah Bungkawn tlawm mah se an insiamtha. Power lakah inkhel hautak paltlangin a hmain 3-1-in Durtlang an hneh tawh a, pathumnaah an inhlangkai.
Luangmual laka tlawm tawh Power tan veteran Vardingliani’n point 20 hmuin, tum nga a tisual a; league kal meka set nga hmanga inkhel chinfelna hmasa berah team inel zinga player kum chawhruala upa ber Power an bet hmasa zawk zel a, kir leh thin mah se a chak tur tihfelna hnuhnungah an fei zo lo.
Chutih rualin set hnih an lak theih avangin a vawikhatna’n Power-in point an thawkchhuak a; player inkhairual zawk Bungkawnin point thum hlawh zo loin point hnih an neih belh a, an chak theihna’n F-i kawppui RK Lalfakmawii’n point 23 hmuin vawi ruk a paih a, PC Lalrinpuiin vawi sarih tisualin point 13 a thawh.
Final vawi hnih lut tawh Bungkawnin Nilaini tlaiah fiahna hmachhawnin, vung taka hma lam pan mek Luangmual an khelhpui leh dawn a, 2017 champion Power-in fiahna tling Kanan an bitum ve thung ang.