Biak in chhunga Sabrina Carpenter ‘Feather’ music video shoot phalsaktu puithiam an chawlh tir
Sabrina Carpenter hla ‘Feather’ music video sawi hlawh tak Williamsburg, Brooklyn biak in chhunga shooting neih chungchang chu kohhran thuneitu ten an chhuichian hnuah he biak in enkawltu puithiam Monsignor Jamie Gigantiello chu a hna atanga chawlhtir a nih thu an puang a, Associated Press-in a tarlan danin kohhran thuneitu ten an chhuinaah hian biak in enkawlnaah thil fel lo dang an hmuchhuak tel bawk a ni.
Bishop Robert Brennan chuan Roman Catholic Diocese of Brooklyn-in thuchhuah an siamah Gigantiello chu ‘pastor hna lam thil reng reng leh inrelbawlna lam thil zawng zawngah’ chawlhtir a nih thu a sawi a, an chhuinaah hian Gigantiello hian phalna la lo leh midang hriatpui lohin New York City Mayor Eric Adams administration hnuaia hotu lawk tak hnenah sum a lo transfer a, Eric Adams hi hlepru a puhnaah chhui mek a ni bawk.
Sabrina Carpenter ‘Feather’ music video hi Our Lady of Mount Carmel-Annunciation Parish, Williamsburg-ah shooting neih a ni a, he music video-ah hian biak in chhungah Sabrina Carpenter hian mipa amah khuaikhem tumtu te an thih zel dan vel te a lang a, a scene tawpna, biak in chhunga an chanah chuan Carpenter hi biak in chhung hmun serhah thawmhnaw dum tawngchham tak leh veil khumin, mipaho vuinaah a lam kual a, maicham a sakhaw serh leh sang thil bulah thla te lain, kuang a ‘RIP B-ch’ tih inziak te pawh a lang.
Gigantiello hi he music video an tlangzarh hnu lawk, nikum November thla khan biak in bungraw hman danah diocesan policy zawm lo tiin administration lam hna zawng zawng an lo chawlh tir tawh a, Gigantiello hian an Kohhran Facebook page-ah thupha chawina tichhuakin, video siam a phalna a pek ngei thu sawiin, mahse, a final scene chu a hnenah a scene plan an theh luhah a tel lo niin a sawi a, hemi chhan let nan hian Carpenter chuan a team ten phalna an la hmasa vek niin an sawi ve thung.
Brennan chuan, “Alvarez & Marsal leh Sullivan & Cromwell LLP ten an chhuinaah Our Lady of Mount Carmel – Annunciation Parish-ah hian Diocesan policy leh protocol bawhchhiatna serious tak hai chhuah a ni hi pawi ka tiin, rilru a na hle a. Mipui rinna kan neih zel theih nan leh kohhran sum vawnhim nan Bishop Witold Mroziewski chu Parish administrator atan ka ruat a ni,” tiin a thuchhuahah chuan a tarlang.
Mroziewski hian he biak in hi enkawl tawh dawn mah se Gigantiello hi Mroziewski phalna la hmasain Mass sawi chu an la phalsak tho a ni.
Biak in chhunga Sabrina Carpenter ‘Feather’ music video shoot phalsaktu puithiam an chawlh tir
