Biak in sakna atan kohhran 74-in Apex Bank-ah loan dil
Apex Bank chuan kohhran 74 atanga biak in sakna loan dil, cheng nuai 2370 chu pek a remti.
Mizoram Cooperative Apex Bank Ltd. Board chu Zirtawpni khan an thukhawm a. Mimal leh biak in loan hrang hrang sanction a nih bakah bank hmachhawp rel a ni.
Kohhran hrang hrang biak in sakna loan dilna 74, a vaiin cheng nuai 2370 leh mimal loan dilna hrang hrang 67, a vaiin cheng nuai 959 pek a remti a. Mimal loan dilna hrang hrang hi agriculture, industry, business, society leh sawrkar policy Bana Kaih hnuai amite an ni.
Mizoram hmun kil khawr, bank dah remchan lohna hmuna bank aiawha dawr theih turin banking correspondent (BC) 44 leh khawpuia cheng, bank kal remchang loten a pung awma sum an khawl theihna tur, kawtkai maia sum lam tur – Pigmy collector 21 an la thar a. Banking correspondent leh Pigmy collector-te hi bank nena inthlunzawmna khawl – handheld device pek nghal an ni.
Apex Bank hian branch 31 leh ATM booth 39 bakah mobile ATM 2 an nei a. Deposit cheng vaibelchhe 1685 atangin loan cheng vbch. 1222 an pechhuak mek.
Biak in sakna atan kohhran 74-in Apex Bank-ah loan dil
