Bial 12-ah bial 9 tal lak kan tum
– Lalchhandama Ralte
Sinlung Hills Council inthlanpuiah bial 12 awmah bial 9 tal la turin an inbuatsaih mek tih MNF vice president Lalchhandama Ralte chuan a sawi.
Sinlung Hills Council (SHC) inthlan tura campaign mek Tuivawl bialtu MLA Lalchhandama Ralte hian Tuivawl bial chhung bial 6-ah a vaiin an lak vek theih a ring tih a sawi a. Chalfilh bial lamah bial 4-ah bial 2 tal, Serlui bialah bial 2-ah bial 1 tal, a vaiin bial 9 tal la turin an inbuatsaih mek tih a sawi a. Hmar tlangdung hmangaihtu tak tak, bial chhung hmangaihtu tak tak chu tute nge tih ngaihtuah a, vote hmanga duhthlanna dik hmang turin mipui a sawm tih a sawi a ni.
Council term kaltaah khan Covid-19 vangin kum hnih leh a chanve, term chanve deuhthaw hna thawk hleithei loin an awm a, chumi piahlamah SHC-a an thawhpui HPC party chhungah inlungrual lohna, thuneihna inchuhna a awm avangin thuneihna inthlakin, a châng chângin sawrkar tum li tum nga inthlak ngaiin an awm tih a sawi.
Pathian leh mipui zarah tun inthlanah an sawrkar dawn tih MNF hruaitu hian sawiin, “Council budget kan neih, development fund leh engkim mai dik takin kan hmang anga, Council sawrkar nghet leh mumal tak, hnathawk thei kan din dawn a ni,” a ti.
Sawrkar hrawn mekin beiseina sang tak min neih tir a, mipui min duat em em anga insawi reng siin, mipui min sawrfu mek tih leader of opposition Lalchhandama Ralte hian a sawi. Buhfai man sang takin an tipung a, chhiah hrang hrang an tisang, tiin, “Kan ti ang, an tih chu kan ti lo ang tihna, kan ti lo ang an tih chu kan ti ang tihna a ni a, an insawi loh ang zela awm hi kalphung thar chu a ni ber,” a ti.
Bial 12-ah bial 9 tal lak kan tum – Lalchhandama Ralte
