MLA inthlanpui neih turah bial 26-ah chuan hnehna an chan chian an beisei tih MNF Thalai chuan an sawi.
MNF Thalai vice president Zodinpuia chuan inthlanpui neih turah MNF chuan Pathian leh mipui duhsakna avangin sawrkarna chan leh ngei an inbeisei a, hnehna chang turin theihtawp an chhuah tih a sawi. Tun dinhmunah Mizorama MLA bial 40 awmah MNF chuan bial 26-ah hnehna chan an inbeisei tawh tih sawiin, “Bial 14 dangah pawh MNF hmasawnna chak takin a kal mek a. Bial hrang hrang dinhmun thlirin bial 9-ah Congress party nen fal takin kan inbuan mek a, bial 4-ah BJP chuan MNF an hnaih ber niin kan hria a, MNF leh BJP inbeihna bial 4-ah hian ZPM miten BJP candidate an pui tan niin thu kan dawng,” a ti.
MLA nih tuma chuhtu mi 174-ah criminal case nei mi 6 zinga mi 4 chu ZPM official candidate an ni tih sawiin, chutiang mi vawrh chhuaktu ZPM party chuan an candidate-te sum lakluhna a thianghlim em, tih pawh an ngaihtuah lo nia a lan thu leh, mi hausa leh milar ringawt buaipuitute chu kum 5 chhung ram rorelna fawng chelh turin mipuiin enchhin tlakah an ngaih an rin loh thu a sawi.
MNF party chu eptuten a chhe thei ang bera puhin, mipui rilru hruaikawi tum thin mah se, ram hmasawnna hna tam tak a thawh avangte, Mizoram political party zinga hruaitu nei tha a nih avangte, Mizo hnam venghim tura Pathianin a pek a nih avangte, Mizo thalaite leh zirlaite ngaihsaktu, Mizo mipui hnena politics dik zirtirtu, ram leh hnam hmasawnna tura pawimawh, ‘infrastructure development’ din kawnga hna thawk tha a nih avangte, Mizoram ri humhalhna kawnga a huaisen avangte, khawvel hmun hrang hranga Zofate kuahkhawmtu a nih avangte, MNF sawrkar hnuaia hnalakah sawisel tur a awm loh avang leh buhfai leh gas a hnianghnar thin avangte, kohhran leh tlawmngai pawlte nen thawhhona tha an neih thin avangte in Pathian leh mipui duhsakna changin an sawrkar leh ngei dawn tih MNF Thalai hruaitu hian a sawi a ni.
Bial 26 ah kan chiang tawh – MNYF
