Bial chhunga HSLC exam
top ten-a langte lawmpui
Aizawl North III bialtu MLA, minister K Sapdanga chuan an bial chhunga HSLC exam top ten-a lang mi pahnih chu Thawhtanni khan lawmpuiin sumfai leh memento a hlan. MLA hi AMC Ward No.VI corporator H Lalremtluanga bakah Chanmari Local Council-ten an tawiawm.
Aizawl North III huamchhungah matric top ten-a lang pahnih – Lalruatkimi Khiangtea d/o Lalhmingthanga, Chanmari (8th rank) leh Harry Lalruatfela s/o Lalrinchhana, Chanmari West (10th rank) an awm a ni.
Bialtu MLA chuan a bial chhungah matric top ten chawimawi tur mi pahnih an nei thei chu a lawm hle a, hlawhtlinna nasa zawk an chan theihnan tang sauh sauh turin a beisei tih a sawi. Result chhuah hlimah lawmpuina inhlan an duh viau rualin, class XII result chhuak leh mai tur a nih avangin an nghak rilru a, vanduaithlak takin class XII lamah top ten chawimawi tur an bial chhungah an nei ta lo tih a sawi a ni.
Bial chhunga HSLC exam top ten-a langte lawmpui
