Davis Hriatpuia
Thlarau nun châwm hi kan duh a, eng emaw taka rilru tih thawven veng vengna leh kan thinlung eng emaw taka khawih leh ‘feel’ veng veng hi Pathian thu kan ngaihthlak leh kan chhiara kan zawn tam ber a ni mai awm mang e. Kan emotion khawih theitu hi kan zawng ber em aw, ka lo ti mai mai thin. Ni e, chu chu a pawimawhna chen tam tak a awm mai thei. Pathian thu kan mamawh dan hi Palestine rama naupang riltamin chaw a mamawh dan leh ram ral muanga naupang riltamin chaw a mamawh dan nena inang lo ang a ni thei. Chu tak chu a ni, vawiin khawvelin a mamawh Pathian thu hi eng nge tih ngaihtuah ngai chu. Vanram inngaihtir chiam a, he leia ruma tah tlawk tlawk hi sawi mawi a, tute emaw tan khawvel chu lo hrehawm se, tute emaw tan khawvel hi nuam tawlna in lianpui ang lo ni se, chu chu thil nihphung ve reng, he leia an chanvo tur renga ngaihtir nge duh taka Pathianin a siam he leiah hian rorelna dik an hmuh hi kan duh? Chuti ang a thlen theihna turin zirtirna Bible-a kan hmuh reng lai hian engah nge chûng chu kan hmuh ve theih loh a, zirtir kan nih loh? Rorelna dik (Justice) tel loin Pathian biakna dik a awm thei lo a ni tih hi engah nge kan hmuh fiah theih loh? A chhan tam tak zinga bûk rit ber pakhat nia ka hriat ve chu mi ngo theology-in min awp behna hi a ni.
Mi Ngo Theology: Thlarau Lam Ringawta Insawrbingna
Mi ngo theology ti-a hemi thuziak huang chhunga sawi kan tum ber chu European leh Euro-American mi thiamte’n an siam chhuah Kristian theology hi a ni ber a, an Pathian thu pawm dan zawng te leh Kristian sakhua chu heti hian a kal tur a ni a, heti hian inkhawm tur a ni a, Pathian thu pawh hi heti zawnga ngaih tur hi a ni, tih chi anga an tuh tlat hi kan sawi tum ber a ni. Tin, anmahni nunphung, khawtlang leh politics ngaih dan chu khawvel pum huap leh Kristian theology kalphung pangngai tur renga min ngaihtirnain min sal bet tlat a, vawiin thlengin a zung zâm a la cham reng. Hei hian Pathian thuin min zirtir a tum leh theology dang tha tak tak pawh khaw dang sial hmuha min hmuhtirtu pakhat a ni.
Mi ngo theology tih hian sawi tur tam tak a awm thei ang. Chûng zinga a serh zinga mei ang ni tlat chu thlarau lam ringawta insawrbingna hi a ni. Hei hian keini Sap misawnariin a luh chhuah te pawh min kangkai ta zel a. Bible-a thu reng reng hi thlarau nun châwm tur chiah, Pathianin a siam he lei thlarausan daih zawnga Pathian thu chhiar leh hriat thiamna te hi a ni a. Isua chhandamna pawh thlarau chhandamna, sal chhuah a tih pawh thlarau sual sal, mitdel a tihdam pawh thlarau mitdel ata thlarau mitvarna, he leia thil tha tih pawh vanram kai nan chiah – heti ang huangah ringawt hian Pathian thu hi kan khung thin. Mahni rilru nawm veng vengna leh emotion chawk tho zawng ringawta Pathian thu chhiarna leh hriat thiam tumna te pawh hi a ni ang chu. Ni e, heng hi a context azirin a dikna a awm vek ang. Mahse, engkim mai thlarau lam (spiritualized) zawng veka Pathian thu dawnsawn leh hriat thiam kan tum vek chuan Pathian thuin a tum tam tak kan thelh duai thei. Bible tawngkam zawng zawng deuh thaw thlarau lam thila hman tam lutuk hian rinna chu politics, khawtlang leh economic lama thil thleng tak takte (realities) atangin ramri a kham ta tlat a. Hei tak hi a nia, theologian ropui James Cone te pawhin mimal chhandamna leh vanram lam a ngaih pawimawh ber avangin mi ngo theology hian chi inthliarna (racism), awp behna (colonialism), rah behna (oppression) leh economic exploitation te chu a ngaihthah fo thin an lo tih ni. Heti ang theology hian hrehawm tawrhna leh dik lohna (Injustice) tak tak a hmachhawn theih loh avangin tihduhdah tuarte tan chuan theology hman tlak lohah a chhuak mai a ni. “Mi tihduhdah tuarte hrehawm tawrhna ngaihsak lo theology chu Kristian theology a ni lo,” a ti hial reng asin.
Pathian chu thlarau a ni a, kan ti a, ni e Bible-a Pathian thu kan hmuh pawh hi thlarau thil tam tak a awm tih chu kan hmuh kân bik awzawng lo. Thlarau chhandamna pawh thil pawimawh tak, a pawimawh lai ber pakhat a ni ngei mai. Mahse, thlarau chhandamnaah chiah khung vek tur a ni lo. Kohhran siam thatnaa a sulsutute zinga mi Johan Calvin-a khan, “Mihring tlukna hian Pathian leh mihring inlaichinna bakah mihring leh mihring inlaichinna te, mihring leh khawvel inlaichinna chenin a tichhia a, chuvang chuan Pathian chhandamna pawh mihring thlarau chhandamna chauh ni loin, mihring nun pumpui leh thil siam zawng zawng chhandamna a keng tel” tiin a sawi. Mimal thlarau chhandamna ringawt ni lo, vantlang pumpui chhandamna te, ei leh bar bakah politics thlenga chhandamna (socio-political, economics) a huam tihna a ni. (Zofate u, Finna Zawng Ula – F. Vanlalrochana, 2022)
Heti hian entirna pakhat han pe ta ila: ‘Pathian Ram’ tih hian thih hnua van lam a kâwk ber lo. Rorêlna dik lo hmachhawn leh history chhûnga hringfate siam tha lehtu Pathian rorêlna chak tak a kâwk a. Chhinghnia leh Beram te dai phul lenga an tlat za theihna hmun, naupangin rul mitmu ko tlanga a kut a nghah ngamna hmun leh inrah behna awm lo rorelna dik (Justice) a thlenna hmuh, chûng chu a kawh tum ber a ni. Chuti ang ram chu lo thleng turin kan tawngtai thin tak kha maw le!
Mi ngote thlarauna leh Zawlneite au aw
Bible-ah hian thuneihna (power & authority) te, dan te, ram rorelna chungchangte kan hmu a. Zâwlneite khan lal, lalram, leh rorêltu mi ropuite an hmachhawn fo thin. Zawlnei Amosa chuan economic exploitation demna thu a tlangaupui a; Isaia chuan rorelna dik lo a sawisel a; Jeremia chuan lal ngaih dan (royal ideology) a dodal. Heng tlangau thu hi thlarau lam thil veka kan hnuh luh chuan a nihna tak leh a thuchah tak kha kan phawk chhuak dawn lo tihna a ni. Thuthlung Hluiah Pathianin Sabbath leh Jubilee kumte hmanga dan a pek te, leiba ngaihdamna te, ram neitu dik hnena pek let te leh ram sem zâite te kan hmu a, heng dante hi tu mah rethei lutuk emaw, hausa lutuk emaw an awm loh nan a ni (Leviticus 25). Hengte hi a pawimawh hle a, thlarau lam ringawta Pathian thu dawnsawn kan tumna hian kan mit a tidel thin hi a pawi hle.
Rorelna dik tel loin thlarauna dik a awm thei lo
Bible hmun tam takah mi rethei leh mi hnuaihnung zawk te, khawtlanga ngaih pawimawh ni ve ngai lote ngaihsak lohna hi Pathianin a huatzia kan hmu ang. Rorelna dik (Justice) tel loin Pathian lawm tlak sakhuana dik a awm thei lo a, thlarauna dik a awm thei lo a ni tih pawh kan hmu ang – Tharau lam ringawta insawrbing kan bansan chuan. Amosa lehkhabu hi rorelna dikna (Justice) tel lo a Pathian biakna dik a awm theih lohzia sawi chiang bertu zinga mi a ni. Mahse, mi ngo theology zawmtute kan nih vang ni maw, kan cháng thlan a ni ngai meuh lo. Pathianin sakhaw kût te, fakna hla te, inthawina te chu mi retheite tihduhdah an nih avângin a hnawl a (Amosa 5: 21-24). Rorêlna dik a awm loh chuan sakhuana dik a awm thei lo. Mi rethei leh a chan chhe zawk khai chhuahna ngaihsak loh te, eirukna avanga ram mipui leh leilungin a tawrhna te, raltlan en hranna te, hnam dang leh mi chak lo zawk te awp a, rap bet a, heng mite rumri pawh hre thei lo khawpa thlarau mi nih hi Pathian thu nena inchawhmeh lo a ni. Zawlneite chuan rorêlna dik (Justice) chu thil penhleh ve mai ni lo, thil tha a nih avanga tih ve mai tur ni loin, kan rinna kawngah thil pawimawh tak a ni tih an sawi chiang hle.
Luka 4:18–19-ah Isuan riangvaite hnenah chanchin tha a puang a, sal tangte (captive) leh tihduhdah tuarte (oppress) tan zalenna thu a puang. He thupuan hian chhandamna chu thlarau lam thil piah lamah khawtlang leh politics lam thil a ni tih a tilang.
Tlipna
Mi ngo theology-in min man hneh lutuk avangin kan hnam leh tuna khawvelin a mamawh – theology nghawng lian nei zawk tur pawh kan hmu fuh hlei thei meuh ta lo hi a pawi hle. Tuna Pathian thu kan hriat fiah dan tlanglawn hi chu awp beh theology a nihna chen a la awm leh ta zel. Hei hi Bible kan chhiar dan leh kan hriat thiam dan nasa takin a nghawng a, vawi za chuang pawh chhiar chhuak tluk tluk mah ila, heti ang tarmit atanga kan chhiar chhung chuan kan khawtlang tan, kan hnam tan, kan ram tan, khawvel tan nghawng a nei thei ngai lo ang. Bible hi khawvel siam thatna atan i chhiar thei a, chutin mite awp beh nan pawh.