US President Joe Biden chuan kum 2024 inthlana a elpui ber tura ngaih Donald Trump an Nato a sawiselna chu natak chhang letin ‘chhaw’, ‘zahthlak’ leh ‘American lo’ tiin a sawi.
Democrat Biden chuan Trump an Nato member te defence spending quota tipung duh lo te chu Russia in run mahse pawi a ti dawn lo ti anga a sawi chu a sawiselna hle a.
Biden chuan Trump thusawi chuan US in US allies te foreign aid package $95 billion Senate n a pawm chiah mahse House a harsatna tawk zui thei pawimawhna a pholang tiin a sawi bawk a.
White House a thusawina a neihah Biden chuan US foreign package chu House in a pawm lo a nih chuan Putin a kuta engkim dahna a ni dawn tiin a sawi a, tanpuina pek turah hian Ukraine hnenah $60 billion pek tur a tel a ni.
“US president Russian dictator hmaa kun hniam an la awm ngai lo” tiin Biden chuan a sawi a, “Chiang taka ka sawi duh chu Pathian hmingin ka kun hniam ve dawn lo. A chhawthlak a, a zahthlak a, a hlauhawm bawk a, a American lo bawk” tiin Biden chuan a sawi.
Karkalta Inrinni khan South Carolina a rally a neihnaah Trump chuan Nato member tena sum an thawh tur ang an thawh ve lo chu a sawisel a.
A president nih laia ram lian tak pakhat nena Russia beihthut theihna chungchanga an titidunna sawi langin Trump chuan chu official chuan Nato ah sum thawh tur ang thawh ve lo se Russia in run thut se US in a chhan ang em tia zawhna a tawn thu a sawi a.
“Sum in pe lo va, intihtur in ti lo a ni tiin ka hrilh a ni” tiin Trump chuan a sawi a. “Ka chan dawn lo che u a, an duh duh an tih theih nan ka tur zawk ang. Sum in pek a ngai tiin ka chhang a ni” tiin Trump chuan a sawi a ni.
Biden chuan Trump chuan Nato military alliance chu protection racket angin a ngai tiin a sawi a. “President ka nih chung chuan Putin an Nato ally a bei a nih chuan United States chuan Nato territory inch tin venghim turin a beilet ang” tiin a sawi bawk.
Biden chuan Nato in Article 5 a member state in beih a tawh chuan Nato member tin te tanghovin an beilet ang tih chu tum khat chauh 11 September 2001 a US in beih a tawh chauh khan hman a la ni tiin a sawi bawk.
House Republican te hriat tur ngeia sawi bawkin Biden chuan, “Ukraine in thlawp dawn nge Putin intan zawk dawn? America nge Trump in thlawp dawn?” tiin zawhna a siam bawk.
Financial Times report dan chuan Nato member ram 31 a 18 te chuan gross domestic product atanga defence budget a 2% hman tur tih target siam chu an khum dawn a ti a. Nato member zingah GDP atanga defence a sum seng hnem ber chu Poland niin US ai pawhin a seng hnem zawk.
Kum 2016 khan Nato member panga chauhin target siam an khum thei a, chuvang chuan Trump chuan nataka member ram te chu sawiselin US chu Nato atangin a inhnukdawk duh hial thei tiin a vau a ni.
Ukraine aid leh US-Nato relations chungchanga Biden leh Trump te inbeihna hi kumin US presidential election a danglamna nasa tak siam theia ngaih a ni a. Biden chuan democratic ram leh authoracy ram te inngurnaah US chu pawimawh angah a ngai a. A ngaihdan chuan Ukraine chu inbeihna hmunpui ber ni mekin European ram, Nato leh EU member te chu thawhpui ramah a ngai a ni.
Trump an president kum li a chelh chuhng khan US chu multilateral alliance ah tel lo se a duh thung a, chu aiah chuan US chu ram hrang hrang te nena direct a inlaichinna neih a duh zawk a, America First tia sawiin global outlook a ngaihsak lem lo zawk. Nato leh US allies te chuan American interest an ngaihsak lo a nih chuan hnawl theih maiah a ngai a ni.
Senate in Thawhlehni a tanpuina a pawmah $60 billion chu Ukraine tan a ni a, Taiwan leh Asia a US allies te tan $8 billion, Israel in Hamas te a beihna tanpui nan $14 billion leh Gaza buainaa humanitarian aid atan $10 billion te a ni.
Biden an Trump selna
