Bihar-a SIR kalpui turah INDIA-in ECI lenchilh
Eptu party tangrual, INDIA chuan Election Commission of India (ECI)-in Bihar assembly inthlan neih mai tur hmaa electoral roll special intensive revision (SIR) neih a tum chu a dik loh thu leh voter tam tak paihna tur a ni tiin tha an tih loh thu an thlen.
INDIA-a tel – Congress, RJD, CPI(M), CPI, CPI(ML)-Liberation, NCP-SP leh Samajwadi Party aiawhte chuan Nilaini khan Chief Election Commissioner Gyanesh Kumar leh hotu lian dangte chu Nirvachan Sadan-ah hmuin SIR kalpui tur an duh lohna an thlen.
“Kalpui dan tur, a hun leh tih dan tur hi rah duhawm lo tak thlenin voter ni ngei nuai tel a paih daih thei dawn a ni,” tiin thu an thlenah hian an tar lang.
Eptute hian ECI-in thil kalpui a tum dan chu harsa leh khirh, phur rit a nih theih thu sawiin voter-te pian kum azira an nu leh pa birth certificate phut tel chu thil tih buaithlak tak a ni dawn tih an sawi a. Heng thil finfiahna phut tlat hi ‘Bihar-a voter vaibelchhe 8.1 tan a khirh lutuk’ niin an sawi.
Commission-in kum 2003-a electoral roll-a hming chuang tawh chin chauh SIR tih tura telh ve loh tur a tih pawh tha an tih loh thu an sawi bawk.
“Election Commission hian kum 2003-a hming chuang tawhte chu inziah luh that leh ngai lo turin a ti a, heta tel ve lote tan chuan a thar vekin thil kalpui a ngai dawn a. Hei hian dan ang taka intluktlanna a awm lohzia a tilang a ni,” an ti.
SIR tih tum chu ‘mi hruai kawi theihna leh tih dan dik a ni em tih zawhna awm thei tak’ a nih thu INDIA tanghote chuan sawiin mi tam tak paih theihna zawk a ni thei niin an ngai.
Election Commission pisaa thu an thlen zawhah Congress hruaitu, Abhishek Manu Singhvi chuan, “A lo berah mi vaibelchhe hnih chuan he thil hi an ti thei dawn lo va, a bikin Scheduled Caste leh Tribes ten an ti thei dawn lo va. Bihar-a vote vaibelchhe riat dawn hi khawsak pawh hniam tak tak an ni hlawm a, hun rei lo te chhunga an nu leh pate birth certificate an nei mai thei danw lo chiang a ni,” a ti.
Singhvi-a chuan dan ang taka thlir pawhin a dik em tih zawhna a awm tih a sawi a, voter-ten inthlan puan tawh hnuah an hming a awm lo tih hre ta se ziak lut thar turin hun an nei dawn lo tih a chiang reng tih a sawi a. “Inthlan buatsaih a nih tawh chuan tute mahin paih an nih chu an khing let thei dawn lo va, inthlan laiin court-in khinna a ngaihtuah dawn lo tlat a ni,” a ti.
Commission-in tuna SIR kalpui a duh ta thut chu mak a tih thu Singhvi-a chuan a sawi bawk a. “Kum 2003 khan ennawn hnuhnung ber a ni a, kum 22 liam tawhin inthlan pawh vawi li vawi nga a awm tawh a. Khang inthlan kha a dik lo nge fel tawk lo a awm, a rintlak tawk lo tihna em ni? SIR hi inthlanpui hma kum khat leh assembly inthlan hma kum hnihah tih a ni thin,” a ti.
Bihar-a SIR kalpui turah INDIA-in ECI lenchilh
