Bihar-a vote ruksakte mi retheite vek – Gandhi

Bihar-a vote ruksakte mi retheite vek – Gandhi
Congress hruaitu, Rahul Gandhi-a chuan tun hnaia Bihar-a electoral roll atanga an hming paihsak mi nuai 65-te chu mi rethei leh khawtlanga a hniam ber berte vek an ni tih a sawi.
Bihar fanga Voter Adhikar Yatra neia hun hmang mek, Gandhi-a hian Ningani khan Sitamarhi-ah hun hmang Bihar mipuite chuan BJP leh Election Commission-in vote thlak theihna dikna an neih chu ‘an ruk’ an phal lo tih a sawi.
Bihar hi kumin kum tawp lama assembly inthlang mai tawh tur a ni.
“Vote ruknaah BJP leh EC hi an inhnamhnawih ngei a. Maharashtra, Haryana leh Karnataka-ah pawh an lo ti tawh a. Tunah hian Bihar-ah pawh tih leh an duh a, hei hi chu kan phalsak dawn lo a ni,” a ti.
Gandhi-a hian hun lo kal leh zel turah ‘vote ruk’ tia a sawi chu a finfiahna a phawrh belh zel dawn tih a sawi bawk.
Ningania vantlang inkhawma hun a hman hma hian Janaki Temple lar tak chu tlawhin a tawngtai hmasa bawk.
Chawhnu lamah Himachal Pradesh Chief Minister Sukhvinder Singh Sukhu-a’n Motihari-ah Voter Adhikar Yatra hi a zawm ve a. Ani bakah hian RJD hruaitu, Tejashwi Yadav leh INDIA tangruala tel party hrang hrang hruaituten an zawm bawk a. A chung hawn SUV chungah hruaitute hi chuangin mipui tam takin an bawr a ni.
Sukhu-a chuan, “Motihari-ah Voter Adhikar Yatra-ah ka tel ve a, mipui rorelna kalphung dik a awm theihna atana au chhuahna hi a ropui tham hle a. Pu Rahul Gandhi-a kaihhruaina hnuaiah Bihar pum puiin vote ruk duh lohna leh dik lo taka thil tihna an do va, mipui rorelna an duh a ni,” tiin X-ah a tar lang.
“Thalaite duh, lo neitute manganna leh mipuite aw chu thuhmun a ni tawh a. Vote ruk hi dan bawhchhiatna a ni ringawt lo va, mipui rorelna beihna a ni a. Indian zawng zawngin kan chhan leh leh danpui vawn him hi kan tih ngei ngei tur a ni,” a ti bawk.
Bihar-ah hian EC chuan electoral roll special intensive revision (SIR) neiin mi nuai 65 vel an hming paih nia sawi a ni a. Hei hi Gandhi-a chuan BJP nen ‘vote an ru’ nia sawiin a duh lohna lantir leh assembly inthlan tura campaign-na ni bawkin Voter Adhikar Yatra hi a kalpui a. Bihar district tin tlawh turin hun a hmang mek a ni.