bihar-ah Caste quota tihsan tum

Bihar Cabinet chuan Scheduled Castes (SCs), Scheduled Tribes (STs), Other Backward Classes (OBCs) leh Extremely Backward Classes (EBCs) te tana seat reservation a kalpui chu tuna 50% hman mek atangin 65% in a tipung dawn a, Supreme Court in ceiling a siam ai pawha sang zawk niin November 9 a Winter Session neih mekah bill pharh a ni ang.
Bihar Chief Minister Nitish Kumar chuan State Assembly a caste survey report pharh a nih hnu lawkah quota tihsan tur thu hi a puang.
“Caste survey report duh dan angin Other Backward Classes & Extremely Backward Classes, Scheduled Castes leh Scheduled Tribes te quota tihsan ngai a ni. Population a zirin caste group te quota hi a sang thei bawk,” tiin Chief Minister chuan a sawi a. “Ngaihtuah hnuah tihtur pawimawh kan ti ang a. Tun session hian thlak danglam ngei kan tum a ni,” tiin a sawi.
Bihar population atanga 19.7% hauhtu SC te chuan tuna 16% quota an neih atangin 20% ah tihsan a ni ang a, ST population atanga 1.7% share nei te pawh 1% atangin 2% ah tihsan a ni ang a ti bawk a. Population atangin OBC te 27% ten quota 12% an nei ang a, EBC te 36% hauhtu ten quota 18% an nei ang a, community pahnih te quota chu 43% a ni dawn a ni tiin Kumar chuan a sawi bawk.
He quota tihsan hian Economically Weaker Sections (EWS) tana 10% reservation chu a huam lo bawk a. EWS quota nen Bihar-in reservation a siam tum chu 75% ni chho lawih dawnin Supreme Court-in reservation ceiling a siam 50% a khum dawn a ni.
House-a caste survey pharhah hian social leh economic data report pawh a tel a, chutah chuan State a chhungkua 34% te chuan thla khatah sum Rs 6,000 aia tlem an lalut thei chauh a. Upper castes te population atanga 15.4% te zingah Bhumihars 2.9% te chu midang te aiin an rethei zawk a, Yadavs 14.3% te pawh OBC te aiin an rethei zawk bwk a, anni hi population atanga 27% hauh tute an ni. State pumah chhungkaw rethei 94 lakh vel awm anga ngaih a ni a. State literacy rate chu kum 2011 a 61.8% atangin tunah chuan 79.7% ah a sang tawh a ni.
Report pharh hi Opposition BJP legislator te chuan an el nasa hle a, ruling coalition Janata Dal (United) leh Rashtriya Janata Dal te chuan an vote bank Yadavs leh Muslim te population an tipung an tihkhum bawk a.
Heng hi chhangin Kumar chuan, “Ram chhungah caste survey pawh neih a nih ngai miah loh laiin caste emaw religious group te figure engtin nge tihsan ngawt theih a nih ang. Caste survey process kum 1930 vela kalpui tana nih khan British te rorel lai a ni a. A hnuah caste survey chu tihtawp a ni a, ram pum huapa neih kan rawt chungin kan rawtna a tlang ngai lo a ni,” tiin a chhang thung.
Opposition BJP leader te chu hrilh letin, “Kan vaiin political party pakua ten lungrual taka pawmin Prime Minister pawh hmuin kan thlen a nih kha,” tiin a sawi bawk.
Political analyst Ajay Kumar chuan Bihar CM rawtna kalpui hi Lok Sabha poll atana inpuahchahna nia a ngaih thu a sawi a.
“Kumar hian caste survey report hi nakuma Lok Sabha inthlan tur leh kum 2025 State Assembly inthlan tur atan hlawk nana hman a tum a ni. Opposition BJP te hian engtiangin nge an chhan let ang tih chu a ngaihnawm ang,” tiin a sawi.