Bihar-ah party pahnihin eptu tangrual zawm, seat insem danah lungrual a harsa dawn?

Bihar-ah party pahnihin eptu tangrual zawm, seat insem danah lungrual a harsa dawn?
Bihar assembly inthlan a hnai zel a, NDA leh Grand Alliance-a telten bial dinna tur inchan sem dan tur sawi thawm a ring mek zel a. Rorel lai tangrualah hian Chirag Paswan, Jitan Ram Manjhi leh Upendra Kushwaha te chuan a hma aia bial tam zawk an duh theuh avanga thil chin fel mai an harsat dawn nia a lan laiin eptu lam pawh party pahnih, Hemant Soren-a kaihhruai Jharkhand Mukti Morcha (JMM) leh LJP-a Pashupati Paras-a kaihhruai zawk lamin an zawm thar a. Congress leh CPI-ML chuan bial tam zawk an duh ve bawk a, neuh neuh a la awm thei.
Bihar-ah hian eptu lam tangrual, Grand Alliance an tihah hian party paruk – Lalu Yadav-a kaihhruai Rashtriya Janata Dal, Congress, CPI, CPM leh VIP an awm a. JMM leh LJP (Paras) an luh belh leh.
Bial 243 awm chu party pariatin an insem a ngai dawn tihna a ni a, inlungrual taka insem tur thil chuan indawrna fel tak neih ngei a ngai dawn nia ngaih a ni.
An zinga Paras-a a tel hi Grand Alliance chuan Paswan-a vote tam tak la hek thei turah an ngai a, a bik takin Paswan chhungkaw chawr chhuahna, Khagaria-ah an la hek thei turah an ngai.
Paras-a hi Khagaria-a Alauli assembly bialtu lo ni rei tawh tak a ni a. LJP Paras hian bial hnih thum tal, amah leh a fapa an din theihna tur tal chan an duh nia sawi a ni.
Tangrual hian Paswan-a vote hmuh tur chu Hajupur-ah Paras-a a din chuan pawt hek thei tur niin an ngai bawk.
Jharkhand-a rorel mektu zingah RJD leh Congress pawh an tel ve avangin tel thar pakhat zawk, JMM pawh dinna an pek ngei a ngai tuarah ngaih a ni a. An ding dawn a nih chuan Jharkhand hnaihna – Banka, Munger leh Bhagalpur velah pek an nih rin a ni.
State Congress chief chuan party tinin an bial chu mi dangte tana an ken a ngaih dawn thu a sawi a. Inrinnia Patna-a an thutkhawm zawhah Congress state President Rajesh Ram-a chuan tute pawhin bial hi mi dang an kena tangruala telte lungrual taka an awm theih nan an insem a ngai niin a sawi a ni.
Grand Alliance atang hian kum 2020 inthlanah khan RJD chuan bial 144-a candidate an neihah 75-ah hnehna an chang a. Congress-in bial 70-ah 19 an la a. CPI-ML-in bial 19-ah candidate dahin 12-ah an chak a. CPM-in bial li chuhin bial hnih an la a, CPI-in bial ruk an chuhah bial hnih chauh an la thung.
Tun tumah hian Mukesh Sahni-a kaihhruai VIP (Vikashsheel Insaan Party) chu Mahagathbandhan-ah hian an tel ta bawk a. Ani hian bial 50-a din a duh a, an tling a nih chuan deputy chief minister nih a duh bawk.
Sahni-a hian RJD hruaitu, Tejashwi Yadav-a chu chief minister atana vawrh chhuah a duh a, Mahagathbandhan erawh chuan deputy chief minister atana zawrh turin an ti tawh thung.
Tejashwi Yadav-a leh Congress tan Sahni-a tana hmun ken chu thil harsa tak ni tura ngaih a ni a. A kaihhruai party hian bial 20 atanga 25 tal la ngei turah an inngaih laiin party dangte chuan inthlan hnuhnung berah bial 11 chuha bial li chauh an lak theih avangin an rinpui phak lo hle.
Tun tum inthlanah hian Tejashwi Yadav-a chuan tangrual hi hnam hnuaihnung zawkte zinga tlak nat leh a duh a, chumi tur chuan a bei bawk.
Congress chu inthlan hnuhnung bera bial 70 an chan atangin 60 chauh pek tawh tura sawi rik a ni a. Tlem zawk mah se chak theihna dinhmun leh bial a nih chuan an pawm dawn nia sawi a ni bawk.
Inthlan hnuhnung berah CPI-ML chu an chet that avangin tun tumah hian bial tam zawka din an duh ngei dawn nia sawi a ni.
Eptu party tangrualte hi tun hnaia Voter Rights Yatra-ah khan an inpumkhat tha hle a. Rahul Gandhi-a hova kawng zawhah hian Sahni leh Dipankar Bhattacharya te pawhin an zui nasa hle a ni.