Bill kaltlangpui duh
Trade Union Coordination Committee chuan hnathawktute hamthatna tur Bill siam rawtna chu sawrkarin tihhlawhtling turin kaltlangpui zel se an duh tih an sawi.
An thuchhuak chuan, Mizoram Council of Ministers thukhawmin a pass tak, Proposal for the Mizoram Shop & Establishments (Regulation of Employment and Condition of Service) Bill 2023 chu pass a nih ang ngeiin hnathawktu hnuaihnung leh harsa zawkten an chhawr ngei theihna’n chak taka hma la turin Mizoram sawrkar a ngen tih a sawi a. He bill hi miharsa leh hnathawktu hnuaihnung zawkte tan thil tangkai tak a nih avangin Zoram mipui pawhin zirchiang a, thlawp turin a ngen tih a sawi.
Hnathawktute tana tangkai tur Mizoram Merchant Association-in an dodal chu mak a tiin hriatthiam harsa a tih thu te, hnathawktu lam, Trade Union Coordination Committee chuan an chanvo inrahbeh saknaah a ngaih thu te a sawi a ni.
Bill kaltlangpui duh
