Kerala chuan November 8 khan Supreme Court-ah Governor Arif Mohammed Khan chu State mipuite dikna rahbeh tuma bill pawimawh te a bik takin post-Covid public health kaihhnawih te pawm duh lova puhin a khing a, tun hi a tum hnih khinna a ni tawh.
State aiawh advocate C.K. Sasi chuan Governor chet dan hian Kerala mipui te fundamental rights a bawhchhia a ni tiin a sawi a.
“Governor-in Bill pawm duh lova hun rei tak a hup bet tlat hi Article 14 (right to equality) of the Constitution bawhchhiatna a ni a. Article 21 (right to life) of the Constitution hnuaia Kerala State mipuite rights rahbehna a ni bawk a ni,” tiin tarlan a ni a.
Petition phek 461 laia chhahah hian nikum November 30-a Kerala High Court-in judgement a siam a, Governor hnena bill theh luh Article 200 of the Constitution hnuaia time limit siamsak a duh lohna appeal pawh a tel a ni.
Article 200 chuan Governor hnena Bill pekluh a nihin remtihna a pe tur a ni a, emaw a pawm lo a nih chuan a thawn let tur a ni a. Governor chuan Bill-ah remtihna a pe emaw House-ah pe letin emaw President hnenah emaw enfiah turin a pe thei a. Mahse, Article chuan Governor chu a rang thei ang bera chet la turin a phut thung.
Kerala chuan Bill pawimawh pariat lai Governor kutah a tang mek a ti bawk a. State aiawha ding Senior advocate K.K. Venugopal chuan Kerala in Supreme Court meuh a kal chung pawhin Governor chuan engahmah a ngai chuang lo a ti.
“Bill tam tak te hi mipui kaihhnawih pawimawh tak tak te, chhawmdawlna lam te a ni a, hetianga tihkhawtlai hian mipuite a tawrhtir a ni. State mipuite hremna leh democratic institution namnulna a ni a. Governor hian Bill te hun rei tak tak hupin bill pathum phei chu kum hnih chuang a hup tawh. Governor hian a chenna-a pawm tura bill thehluh te hi a thuneihna liau liau angah ngaiin a duh dan dana a kalpui theihah a ngai a. Hei hi Constitution bawhchhiatna a ni,” tiin petition chuan a sawi bawk.
Kerala mai bakah hian BJP ni lo rorelna state thenkhatte pawhin Governor an neih te chuan bill pawimawh an pawm mai duh loh avangin Supreme Court hnenah an zualko bawk a. Heng bill te hi public health, higher education, Lokayukta leh cooperative societies lam kaihhnawih te a ni hlawm.
Tamil Nadu sorkar chuan an Governor R.N. Ravi chu khua leh tui te duh dan kalha bill te pawm duh lo leh thawn let zelah an puh tawh a.
Punjab pawhin bill thahnem tak Vidhan Sabha pawm tawh chu Governor in a tikhawtlaia a thut bet tlat an ti tawh bawk a.
April thla khan Telangana Governor in bill September 2022 daiha thehluh tawh a pawm mai duh loh avangin Supreme Court a inrawlh tawh bawk a ni.
bill pawm duh loh vangin Governor khing
