Billboard 200-ah “I’m the Problem” a la No.1
Morgan Wallen “I’m the Problem’ album chu Billboard 200 (albums) chart-ah a No.1 a, he chart-ah hian a zawnin thla hnih a No.1 tling ta a, Toby Keith ‘35 Biggest Hits’ chu top 10-ah a lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh, album-a hla a mala hralhna atanga album tlukpui te belhkhawm thin a ni.
Morgan Wallen “I’m the Problem” hi 1,51,000 an hralh leh a, chung zinga 1,43,500 chu streaming atanga album tlukpui (on-demand official stream maktaduai 188.69) niin, album tak tak hralh chu 6,500 a ni a, album-a hla a mal a hralhna atangin 1,000 a tling thei bawk.
Morgan Wallen album pathum “I’m the Problem”, ‘One Thing at a Time,’ leh ‘Dangerous: The Double Album” te chu he chart-a an No.1 hun chhung belhkhawm chu kar 37 a tling tawh a, heti hian Harry Belfonte leh Drake nih rualin, he chart-a mipa zaithiam No.1 nih reiah pangana a ni pha ta. Chart-a mipa zaithiam No.1 ni rei chu Elvis Presley niin, kar 67 a No.1 thei a, Garth Brooks (52), Michael Jackson (51), Elton John (39), Belafonte (37), Drake (37) leh Wallen (37) ten an dawt. Mipa solo artist chauh ni loah chuan kar 132 No.1 ni thei The Beatles tlukpha an la awm lo.
KPop Demon Hunters soundtrack chu 75,000 hralh lehin No.3 atangin No.2-ah a insawn. He album hi kumin soundtrack album he chart top 10-a debut thei awmchhun a la ni a, 2020’s-ah soundtrack album chart top 2-a lang thei pali chiah a la awm bawk.
Chart No.1 lo ni tawh album paruk-in dawtin, Morgan Wallen ‘One Thing at a Time’ chu 39,000 hralh lehin No.6 atangin No.3 a kai thar leh a, SZA ‘SOS’ chu 36,000 hralh lehin No.7 atangin No.4-ah a insawn thar leh a, Sabrina Carpenter ‘Short n’ Sweet’ chu No.9 atangin No.5 a kai thar leh a, Morgan Wallen ‘Dangerous: The Double Album’ chu 29,000 aia tam deuh hralh lehin No.11 atangin No.6-ah a invawrh thar leh a, Bad Bunny ‘Debi Tirar Mas Fotos’ chu 29,000 hralh lehin No.16 atangin N.7 a kai thar leh ta bawk.
Hetihlai hian Karol G ‘Tropicoqueta’ chu 29,000 tling lo deuh hralh lehin No.5 atangin No.8-ah a tawlh ve thung.
Toby Keith album ‘35 Biggest Hits’ chu 26,000 hralh lehin No.43 atangin No.9-ah a invawrh a, he album hi 2008-a tlangzarh tawh kha niin, nikum February thla khan, Keith thih hlimchhawnah No.1 a kai a, tunah hian US Independence Day lawmna boruakah hralh a kal thar leh ta a ni.
Chart top 10 khartu chu PARTYNEXTDOOR leh Drake No.1 album “ome $exy $ongs 4 U” niin, 26,000 ralh lehin, No.17 atangin No.10 a rawn kai thar ve leh ta bawk.
Billboard 200-ah “I’m the Problem” a la No.1
