Billboard 200-ah Kendrick Lamar ‘GNX’ a No.1

Billboard 200-ah Kendrick Lamar ‘GNX’ a No.1
Kendrick Lamar chuan a album thar ‘GNX’ chu thawt lawk pawh awm vak loin a tlangzarh deuh thut a, chuti chuang Billboard 200 (albums) chart No.1-ah a debut thei tho a, he chart-a a album No.1 kai thei pangana a ni a, tun hnaia a album panga tlangzarh te chu chart No.1 an kai vek a ni. Hei bakah hian Cynthia Enrivo leh Ariana Grande channa ‘Wicked’ movie soundtrack pawh No.2-ah a debut.
Billboard 200 chart hi katr khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Kendrick Lamar ‘GNX’ hi kar khat chhungin US-ah 3,19,000 hralhin No.1-ah a debut a, chung zinga 2,85,000 chu streaming (on-demand official stream maktaduai 379.72) niin, album tak tak hralh chu 32,000 a ni a, album-a hla mal hralhna atangin 2,000 a tling thei bawk.
He album hi kumina R&B/ hip-hop album-ah chuan kar khat chhunga stream nasat ber a la ni a, genre dang te nena lak khawmah chuan kumina kar khat chhunga album stream nasat ber pathumna niin, Taylor Swift ‘The Tortured Poets Department’ chiah a pha lo a, Swift-i ‘TTPD’ hi a kar khatnaah stream maktaduai 891.37 niin, a kar hnihnaah maktaduai 428.54 a tling thei a ni.
Kendrick Lamar hian 2022 khan a album ‘Mr. Morale & the Big Steppers’ chu No.1 a kaipui a, DAMN. (2017), Untitled Unmastered (2016) leh To Pimp a Butterfly (2015) te a lo No.1 pui tawh bawk.
Kendrick Lamar hi February ni 9, 2025-a New Orleans-a Super Bowl alftime show headline-tu tur a ni a, a album thar promotion atan a fuh tawk vel dawn khawp mai. Super Bowl halftime show-ah hian a tum hnih inlanna tur niin, 2022 khan Dr. Dre hoin an inlan tawh a, tun tum hi chu a headline-tu a ni ve dawn ta a ni.
Cynthia Enrivo leh Ariana Grande channa musical ‘Wicked’ soundtrack album chu 1,39,000 hralhin No.2-ah a debut a, 85,000 chu album tak tak hralhna niin, 52,000 chu streaming (on-demand official stream maktaduai 67.66) leh album-a hla mal hralhna atangin 2,000 a tling thei bawk.
Chart No.1 hlui Sabrina Carpenter ‘Short n’ Sweet’ chu 69,000 hralh lehin No.5 atangin No.3 a kai thar leh a, chart No.1 hlui tho Tyler, the Creator ‘CHROMAKOPIA’ chu 61,000 hralh lehin No.3 atangin No.4-ah a tawlh a, Billie Eilish ‘Hit Me Hard and Soft’ chu 50,000 hralh lehin No.9 atangin No.5 a kai thar leh ta bawk.
Gracie Abrams ‘The Secret of Us’ chu 48,000 hralh lehin No.8 atangin No.6-ah a insawn a, Rauw Alejandro ‘Cosa Nuestra’ chu 44,000 hralh lein No.6 atangin No.7-ah a tawlh a, chart No.1 hlui, kar kalta a chart top 10 atanga chhuak, Taylor Swift ‘The Tortured Poets Department’ chu 43,000 hralh lehin No.11 atangin No.8 a kai thar leh a, chart No.1 hlui bawk Morgan Wallen ‘One Thing at a Time’ pawh 42,000 aia tam deuh hralh lehin No.12 atangin No.9 a kai leh ta a, Chappell Roan ‘The Rise and Fall of a Midwest Princess’ chu 42,000 hralh lehin No.10-ah bawk a la awm.