Billboard 200 chart-ah Morgan Wallen ‘I’m the Problem’ kar 6 a No.1 ta
Morgan Wallen album “I’m the Problem” chu Billboard 200 (albums) chart-ah a No.1 a, he chart-ah hian a zawnin kar ruk a No.1 tling ta. Hetihrual hian Benson Boone, Karol G leh KPop Demon Hunters soundtrack te pawh chart top 10-ah an debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla, a mala hralhna atanga album tlukpui te belhkhawm thin a ni.
Morgan Wallen “I’m the Problem” hi kar khat chhungin 1,77,000 an hralh leh a, chung zinga 1,68,500 chu streaming (on-demand official stream maktaduai 220.51) atanga album tlukpui niin, album tak tak hralh chu 7,500 a ni a, album a hla a mal a hralhna atangin 1000 a tling thei bawk.
Benson Boone album thar ‘American Hearts’ chu No.2-ah debut-in, 61,000 an hralh thei a, chung zinga 30,000 chu streaming (on-demand official stream maktaduai 40.29) niin, album tak tak hralh pawh 30,000 tho a ni a, album-a hla a mala hralhna atangin 1,000 a tling thei bawk.
‘American Hearts’ hi Benson Boone album pahnihna niin, chart top 10-a lang thei album pahnih a neihna a nih bakah he chart-a a tawn sân ber a la ni bawk. A album hmasa ‘Fireworks & Rollerblades’ chu April 2024 khan an tlangzarh kara 58,000 hralhin No.6-ah a debut.
Karol G album thar ‘Tropicoqueta’ chu 57,000 hralhin No.3-ah a debut a, chung zinga 54,500 chu streaming (on-demand official stream maktaduai 74.64) atanga album tlukpui niin, album tak tak hralh chu 2,000 a ni a, hla a mal a hralhna atangin 500 a tling bawk.
He album, hla 20 awmna hi Karol G album he chart top 10-a lang thei pathumna niin, 2023 khan a album pahnih top 10-ah kaipui tawhin, No.1 leh No.3 a kai a, a album pathum te chu a zawnin top 3-ah vek a debut thei a ni.
Chart No.1 lo ni tawh album pali-in dawtin, SZA ‘SOS’ chu 47,000 hralh lehin No.4-ah bawk a la awm a, Morgan Wallen album dang ‘One Thing at a Time’ chu 37,000 hralh lehin No.5 a la ni a, Sabrina Carpenter ‘Short n’ Sweet’ chu 35,000 hralh lehin No.6-ah bawk a la awm a, Kendrick Lamar ‘GNX’ chu 31,000 hralh lehin No.8 atangin No.7-ah a insawn leh hret bawk.
Netflix animated film KPop Demon Hunters soundtrack chu 31,000 hralhin No.8-ah a debut a, kumin soundtrack album zinga chart top 10-a debut thei awm chhun a la ni. He album hralhna hi 27,000 chu streaming (on-demand official stream maktaduai 37.48) niin, album tak tak hralh chu 3,000 a ni a, album-a hla a mala hralhna atangin 1,000 a tling thei bawk.
Chart No.1 pawh lo ni tawh, Morgan Wallen ‘Dangeorus: The Double Album’ chu No.9-ah bawk a la awm a, chart No.1 hlui bawk PARTYNEXTDOOR leh Drake ‘$ome $exy $ongs 4 U’ pawh No.10-ah bawk a la awm.
Billboard 200 chart-ah Morgan Wallen ‘I’m the Problem’ kar 6 a No.1 ta
