Billboard 200 chart-ah thla 2 chhung Taylor Swift a No.1 ta

Billboard 200 chart-ah thla 2 chhung Taylor Swift a No.1 ta
Taylor Swift album ‘The Tortured Poets Department’ (TTPD) chu Billboard 200 (albums) chart-ah a No.1 a, he chart-ah hian a zawnin thla hnih, kar riat chhung a No.1 tling ta. Hetihrual hian Carli XCX leh Bon Jovi te pawh top five-ah an debut a, ChappellRoan pawh a vawi khat nan cart top 10-ah a lang e.
Billboard 200 chart hi kar khat chhunga US-a album hralh tam dan atanga tehin chart ranking hi siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin US-ah 1,28,000 an hralh leh a, chung zinga 1,04,000 chu streaming atanga album tlukpui (on-demand official stream maktaduai 135.53) niin, album tak tak hralh chu 23,000 a ni a, album-a hla mal hralhna atangin 1,000 a tling thei bawk.
Taylor Swift hian he chart-a No.1 kai thei album 14 a nei tawh a, chung zinga album pali chu chart-a kar riat chin No.1 thei niin, a album dang ‘Folklore’ pawh kar riat a No.1 thei a, ‘1989’ leh ‘Fearless’ album te chu kar 11 ve ve an No.1 thei bawk.
Heti hian he chart-a Taylor Swift album hrang hrang No.1 tawh te No.1 hun chhung belhkhawm chu kar 77 a tling tawh a, he chart-a soloist zinga No.1 ni rei ber a nihna a sawhnghet leh ta sauh a, amah hnaih bertu chu Elvis Presley niin, ani hi kar 67 a No.1 tawh thung. Swift hian No.1 album neih tamah pawh soloist zinga No.1 album ngah ber niin, Jay-Z record a nihrual bawk.
Billie Eilish album ‘Hit Me Hard and Soft’ chu 1,28,000 hralh lehin No.2 a la ni a, chung zinga 1,04,000 chu streaming atanga album tlukpui (on-demand official stream maktaduai 135.53) niin, album tak tak hralh chu 23,000 a ni a, album-a hla mal hralhna atangin 1,000 a tling thei bawk.
Charli XCX album thar ‘Brat’ chu 82,000 hralhin No.3-ah a debut a, he chart-a a tawn sân ber a la ni a, chart top 10 kai thei album pahnih a neihna a ni bawk. Charli XCX album hi album tak tak hralh chu 45,000 niin, streaming atangin 37,000 (on-demand official stream maktaduai 46.72) a ni a, album-a hla mal hralhna atangin 1,000 a tling thei bawk. Charli XCX hian 2022 khan a album ‘Crash’ chu chart No.7 a lo kaipui tawh bawk a ni.
Chart No.1 hlui Morgan Wallen ‘One Thing at a Time’ chu 72,000 hralh lehin No.4-ah bawk a la awm.
Bon Jovi album tar ‘Forever’ chu 52,000 hralhin No.5-ah a debut a, chung zinga 50,000 chu album tak tak hralhna niin, streaming atangin 2000 (on-demand official stream maktaduai 2.31) niin, hla mal hralhna chu chhiar tham a ni lo. Bon Jovi hian chart top 10-a lang thei album 14 an nei tling ta a ni.
Bon Jovi hi kum 40 chuang kalta khan an sinhle ‘Runaway’ avangin Mainstream Rock Airplay chart-ah an lang a, hei hi Billboard chart hrim hrima an lanna masa ber niin, chumi hnu lawkah an self-titled album chu Billboard 200 chart No.178-ah debut-in, he album hi No.43 a kai zui ta a, hei hi albums chart-a an lanna hmasa ber a ni. Tunah chuan Bon Jovi hian Billboard 200 chart-a lang thei album 22 an nei tling tawh a, chart top 10-a an lanna hmasa ber chu 1986-a an album Slippery When Wet kha niin, No.1 a kai a, an album dang panga chu No.1 a kai leh tawh bawk. Bon Jovi hian 1980s, 1990s, 2000s, 2010s leh 2020s-ah te chart top 10-a lang thei album an la nei thei zel a, group zinga hetiang tithei pangana an ni a, AC/DC, Def Leppard, Metallica leh U2 te hnung an zui ve ta a ni.
K-pop group ATEEZ album ‘Golden Hour: Part.1’ chu a kar hnihnaah 45,000 hralh lehin, No.2 atangin No.6-ah a tawlh a, chart No.1 hlui Morgan Wallen ‘Dangerous: The Double Album’ chu 44,000 hralh lehin No.6 atangin No.7-ah a tawlh a, Noah Kahan ‘Stick Season’ chu 42,000 hralh lehin No.7 atangin No.8-ah a tawlh a, Shaboozey ‘Where I’ve Been, Isn’t Where I;m Going’ chu 41,000 hralh lehin No.5 atangin No.9-a a tawh ve ta bawk.
Chappel Roan album ‘The Rise and Fall of a Midwest Princess’ chu 40,000 hralhin No.10-ah a debut a, he chart top 10-a a lanna hmasa ber a ni.