Billboard Hot 100-ah Alex Warren ‘Ordinary’ a No.1 ta

Billboard Hot 100-ah Alex Warren ‘Ordinary’ a No.1 ta
Alex Warren hla hit ‘Ordinary’ chu Billboard Hot 100 (singles) chart-ah No.4 atangin No.1-ah a invawrh ta a, he chart-a Alex Warren hla a No.1 vawi khatna a ni. ‘Ordinary’ hi No.2 te pawh a lo kai zak zak tawh a, No.4-ah tawlh lehin, No.1 a kai thei dawn lo emaw tih tawh hnuah a rawn No.1 leh ta a ni.
‘Ordinary’ hi Billboard Hot 100 chart-a history, kum 66 chhunga No.1 ni thei hla 1181-na a ni. Warren hi music lama full-time a inhman hma chuan TikTok content creator rual khat Hype House-ah a tel thin a, 2022 atang khan Atlantic Records hnuaiah a inziak lut ta a ni. A hla dang ‘Burning Down’ chu nikum October khan chart No.69 a lo kai tawh a, Jelly Roll nena an zi dunna ‘Bloodline’ chu No.32 a kai tawh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
Alex Warren ‘Ordinary’ hian kar khat chhungin stream maktaduai 21, radio airplay ngaithlatu maktaduai 43.5 leh sales 8,000 a nei thei a, hei hi chart No.1 a kai pui ta a ni. Warren hian May ni 26-a American Music Awards semnaah he hla hi a perform a, hei hian a rawn tilar thar leh a, No.1 a kai phah ta te pawh a tih theih ang chu!
Morgan Wallen ‘What I Want’ featuring Tate McRae chu No.1 atangin No.2-ah a tawlh a Wallen hla dang ‘Just in Case’ chu No.2 atangin No.3-ah a tawlh a, a hla dang chart No.1 pawh lo ni tawh ‘I’m the Problem’ chu No.3 atangin a No.4 a tawlh ta bawk.
He chart-a kar 13 No.1 ni thei Kendrick Lamar leh SZA ‘Luther’ chu No.5-ah bawk a la awm a, kar 19 No.1 ni thei Shaboozey ‘A Bar Song (Tipsy)’ chu No.9 atangin No.6 a kai thar leh a, kar 5 chhung No.1 ni thei Lady Gaga leh Bruno Mars ‘Die With a Smile’ chu No.6 atangin No.7-ah a tawlh ve thung.
Chart top 10 atanga chhuak tawh, chart No.1 hlui Teddy Swims ‘Lose Control’ chu No.11 atangin No.8 a kai thar leh ta a, he hla hi Hot 100 chart top 10-ah kar 63 a lang tling ta a, he chart top 10 a lang rei thei ber record a siam a sawh nghet telh telh a, chart a a lan hrim hrim pawh kar 93 a tling ta bawk.
Chart No.2 pawh lo ni tawh Drake ‘Nokia’ chu No.12 atangin No.9 a kai thar leh a, chart No.2 kai tawh bawk Benson Boone ‘Beautiful Things’ chu No.14 atangin No.10 a kai thar leh a, he hla pawh hi chart-ah ranking neiin kar 70 a lang tling ve ta a, he chart-a kar 70 chin lang thei hla 10-na a ni.