Billie Eilish chu BRIT Billion Award dawng thei zaithiam 20-na a ni ta. He award hi UK-a stream tluklehdingawn kai pha hla nei thei te hnena hlan thin a ni a, streaming hi Official Charts Company-in an chhut thin a ni. Billie Eilish hla hit ‘Bad Guy’ chuan UK stream maktaduai 300 chuang a tling a, a hla dang paruk chu UK-a maktaduai 100 chuang stream an kai bawk a, a hla pasarih stream belh khawm chu tluklehdingawn a tling ta a ni.
Eilish hian Official UK Singles Chart-a No.1 kai thei hla pahnih a nei ta bawk a, Barbie: The Album-a a hla ‘What Was I Made For?’ chu No.1 a kai a ni. UK-a a hla No.1 thei hmasa ber chu James Bond film ‘No Time to Die’ soundtrack kha niin, UK-ah hian No.1 kai thei album pahnih a nei tawhy bawk a, a album hmasa ber ‘When We All Fall Asleep, Where Do We Go?’ UK chart-a a No.1 khan tleirawl kum 17 mi chauh a ni a, hmeichhe zaithiam zingah UK chart-a No.1 album nei thei naupang ber a ni bawk.
Billie Eilish hian kum thum chhung chu a zawnin BRIT Awards a dawng tawh a, 2020 leh 2021 khan international female solo artist a thlan niin, 2022-ah international artist of the year a ni leh bawk.
BRIT Billion Award dawng tawh te chu- ABBA, Coldplay, Mariah Carey, Whitney Houston, AJ Tracey, Headie One, Anne-Marie, Ellie Goulding, George Ezra, Lewis Capaldi, RAYE, Rita Ora, Sam Smith, Olivia Rodrigo, Lana Del Rey, Queen, Wizkid, Becky Hill leh James Arthur te an ni.
Streaming hian rimawi khawvel hawiher a tidanglam nasa hle a, tunah chuan UK-a recorded music consumption 85% chuang hi streaming a ni tawh a, 2022-ah khan kum khat chhunga UK-a audio streaming chu tluklehdingawn 160 a tling thei nghe nghe a ni.
Billie Eilish-i’n BRIT Billion Award a dawng
