Bio mass siamna tur enfiah
Ngopa khuaa bio mass siamna tur briquettes siam chhuahna atana hma lak mek chu Nilaini khan Lengteng bialtu MLA Dr L Thangmawia chuan a enfiah. He thil hi a MLA fund leh MGNREGS tangdun hmanga Ngopa khua, Hmunnghak rama bun a ni.
Mizoram tana thil tangkai tur leh a hlawhtlinna hmuh huna Mizoram hmundanga an la entawn tur nia lang, a bial chhunga hmalakna a awm chu lawmawm a tih thu a sawi a. Sum ngaihtuah saktu Mizoram sawrkar Rural Development department hotute chungah leh a bikin, RD minister Pu Lalruatkima chungah a lawm tih a sawi.
Mizorama a hmasaber turin Ngopa-ah hian biomass briquettes siam chhuahna tur buatsaih mek a ni a. He hmalakna hi a taka kalpui a nih hunah chuan faina leh thianghlimna atan leh environment humhimna atan a tha hle dawn a, meihawl atan leh thlasik meilum ai turin biomass briquettes hi a tangkai hle dawn a ni.
Tunah hian hnathawh tur ang zaa 90 vel zawh tawh a ni a. 2023 April thla tawp lamah chuan hawna hman zui theih tura beisei a ni. Helai hmun buatsaih na’n hian Lengteng bialtu MLA hian a fund atangin cheng nuai 2 a thawh a, MGNREGS atangin cheng nuai 28 hmuh a ni bawk a, Ngopa BDO kaihhruaina hnuaiah hna hi thawh a ni.
Bio mass siamna tur enfiah
