Thlai eichhetu rannung eichhe let vetu siam chhuahna tur, State Biological Control Laboratory chu Mizoramin a nei thar a. A dinna Lengpui Vengtharah Ningani tuk khan Agriculture minister C Lalrinsanga’n a hawng.
State Biological Control Laboratory hi himdam leh hrisel zawka thlai enkawlna tura hmalakna a ni a. Thlai eichhetu rannung – pangang, thlangdar, vual adt. tiremtu tur, anmahni that thei chi rannung (parasitoids, predator leh biopesticide) leh hrik (bacteria, virus -NPV, entomopathogenic nematodes leh fungi) te laboratory-a tihpun leh heng biocontrol agent-te hi loneituten uar zawka an hman theih nan a tam zawk siam chhuah tum a ni. Hriselna nghawng pawi thei hlo tur hman tihtawp a nih theih nana loneitute banphaka biocontrol agent chhawpchhuah sak leh a hman dan zirtir, biological control-ah hmasawnna a awm theih nana ICAR-NBAIR nena thawh dun, thlai hrisel leh himdam hlawk zawka tharchhuah kawnga hmalakte chu he project tum a ni.
Laboratory din nan hian a pumpuiin cheng nuai 273.08 ruahman a ni a, NABARD-RIDF XXV sum nuai 250.56 leh state sawrkar sum nuai 22.52 sen a ni a. He project hian component pathum – laboratory building, type-IV staff quarters leh laboratory bungraw leina a kengtel. Lengpui Village Council-in ram a pekah hmalak niin M/s Eastmen Consultancy chuan hna hi a thawk a ni.
Agriculture minister chuan hlo tur hmanga thlai eichhetu tihrem tuma hmalaknain mihring hriselna kawngah nghawng tha lo a thlen thin a, hriselna atana him zawk thlai eichhetu rannung eichhe let vetu siam chhuahna tur hi din a ni ta tih a sawi. Kum 2019-a Fall Army Worm pangang puangin nasa taka Mizorama vaimim chin a nghawng laiin, hemi doletna kalzela pangang thahna – biological control agent tangkai zia hriatbelh a nih hnuah ICAR-NBAIR Bengaluru nen thawkdunin laboratory hi din a ni ta tih a sawi
ICAR-NBAIR Bengaluru mithiam Dr K Subaharan chuan State Biological Control Laboratory bul tan pui bakah kawng engkima puih chhunzawm zel an tum thu a sawi a ni.
Biological Control Laboratory din
