Biological Diversity Day hmang
‘Harmony with Nature and Sustainable Development’ tih thupui hmangin khawvel pumah International Day for Biological Diversity hman a ni a. Mizoramah pawh IDB 2025 pualin hmun hrang hrangah hman niin, Aizawlah chuan Mizoram State Biodiversity Board leh National Biodiversity Authority ten an buatsaih a. Environment, Forests & Climate Change minister Lalthansanga’n a hmanpui.
Minister chuan ram hmasawnna leh thilnung chi tinreng humhalh chu a kalkawp tur a ni, tiin, “Nungcha venhim hi kan hmalam hun innghahna pawimawh a nih avanga thawk tur kan ni,” a ti. Tunlai khawvel inher zelah harsatna thar a lo chhuak zel a, hemi hrereng chungin a humhalh kan ngaihpawimawh a ngai tih a sawi a ni.
International Day for Biological Diversity 2025 lawmna pual hian Mizoram State Biodiversity Board chuan high school zirlai chin tan painting competition, open photography competition leh Biodiversity Management Committee (BMC) tan signboard siam intihsiak a buatsaih a, lawmman hi sem nghal a ni.
Nungcha chi tinreng humhalha venhim an nih theihna turin United Nations Convention on Biological Diversity chu kum 1992-a Earth Summit-ah din a ni a. He Convention-a telho zingah hian India pawh telin, agreement ziaktu ram 196 zingah a tel bawk. Hemi denchhen hian May 22 hi ‘International Day for Biological Diversity’ atan United Nations chuan a puang a, kum 2000 atang khan kumtin thupui thlan bik neiin hman tan a ni.
Biological Diversity Day hmang
