Mizoram sawrkar hnuaia thawkten pisa an luh leh chhuah hun hriat zui a nih theih nana biometric attendance ruahman chu department tinah a vil tur bik – nodal officer ruat an ni a, kartin report thehlut tura tih an ni.
Chief secretary Dr Renu Sharma thuchhuak chuan biometric attendance hi uluk taka enzui a ni dawn tih a sawi a. Department hrang hranga hotuten nodal officer pakhat theuh an ruat anga, an ni hian kartin department hotu hnenah hian an department hnuaia thawktute kal dan a thehlut thin dawn a ni.
Superintendent-te pawh an hnuaia thawk Group B, C leh D te endik turin checking officer an ni dawn a; under sercretary hnenah nitin pisa kal dan an thehlut dawn a ni.
Pisa hun chhunga hmundanga chhuakte chhinchhiah an ni dawn a, pisa kai huna vawi thum aia tam tlaite chu casual leave ni khat leh a chanve ziahsak an ni dawn.
March 15 khan chief minister Lalduhoma chuan a official instagram-ah Aizawl Smart City Ltd kaltlangin biometric attendance hi hemi ni atang hian New Secretariat – MINECO ah hman tan a ni tih a sawi.
‘Hmel leh kutzia hmangin attendance dah luh theih a ni a, office-a thawkte kal hun leh haw hun a inchhinchhiah anga, chu chu department hotu atanga chief minister thlengin an lo en thei dawn a ni,’ a ti.
MINECO-ah hian CCTV 70 leh biometric device 28 dah a ni tawh a, sawrkar department office hrang hrangah dah belh zel tum a ni tih a sawi.
Biometric attendance lak dan vil turin nodal officer ruat
