Biren Singh-a venhimna dawn thin titlem
Manipur chief minister hlui, N Biren Singh-a venhimna pek thin chu Thawhlehni khan tihnepsak a ni.
Manipur Police chuan thuchhuah siamin a hmaa police 17-in an ven thin chu tihtlemsak a ni tih an tar lang.
Singh-a hi February 9 khan bângin February 13-ah hmarchhak state hi President’s Rule-ah dah zui a ni.
Director General of Police (DGP)-in thupek a chhuahah Singh-a vengtute chu an unit-ah let vek turin a ti a. Thupek dang chhuahah vengtu paruk – assistant sub-inspector pathum, head constable pakhat leh constable pahnih pek a ni tih tar lan a ni thung.
Singh-a venhimna pek tihtlem a nih hma lawk hian Governor Ajay Kumar Bhalla chu Raj Bhavan-ah a kawm a. Thawhlehni zan khan Luwangshangbam, Imphal West district-a a chenna inah larsap nena an inkawmna chungchang hi thuthar lakhawmtute a hrilh leh bawk.
Larsap nena an titinaah hian tun hnaia Gwaltabi-a venhim hna thawktuten Manipur State Transport (MST) bus-a ‘Manipur’ tih inziak tihreh/hliah an tumna te, dan lova an state-a lut leh venhimna thil dang dang an sawi tih a sawi.
Governor hnenah hian BJP kaihhruai sorkar khan Ministry of Home Affairs-in ni 30 chhunga tih tur a tihte an ti niin a sawi a, heng zingah hian biometric registration, mi nihna hriat fiah leh dan lova ram dang mi awmte thawn haw te pawh a tel tih a sawi.
“Myanmar atanga kum 1962, 1988 leh kum 2021-a sipai thuneihna a awm hnua lo lut an tam hle a, lehkha nei lova Manipur-a cheng hi an pung hle,” a ti.
“Hna a tam em avang khan governor hnenah pawh MHA-in ni 30 min pek chu pawt sei tura dil turin ka ngen nghe nghe,” tiin chief minister hlui chuan a sawi.
Biren Singh-a venhimna dawn thin titlem
