November 20, Thawhlehni zan khan Tennis hmanga ram leh ram hmeichhiate inelna Billie Jean King Cup (BJK Cup) final khelh a ni a. Italy chuan an khingpui Slovakia chua 2-0 a hnehin an champion.
2023-ah Canada laka tlawma champion zo lo Italy hian champion ngei tumin Slovakia an hmachhawn a, an phu ang ngeiin an champion zui ta bawk. Italy tan hian Jasmine Paolini a khel tha chhunzawm a, an champion theih nan a thawhhlawk leh pek hle.
Italy tan hian mial inkhelah Lucia Bronzetti a inlan hmasa a, a khingpui Viktoria Hruncakova lakah 6-2 6-4 in a chak a, Italy in 1-0 in hma an hruai. Bronzetti chak hnu hian inelna neih meka khel tha tluang tan Jasmine Paolini chuan Rebecca Sramkova a hmachhawn zui leh a. World No. 4 Paolini hian Sramkova lakah awlsam tak; 6-2, 6-1 in hnehna a chang a, Italy chu BJK Cup champion thar an ni ta a ni.
BJK Cup-ah Italy hi vawi nga an champion na a ni a, kum 11 zet hnua an champion leh hmasak ber tum a ni tel bawk. Champion team hian £1.9m) an dawng. Kum 2024 hi Italy tan Tennis-a kum tha a ni a. BJK Cup-ah an champion bakah Jannik Sinner chu mipa lamah a vul viau bawk. Davis Cup-ah Italy champion pui tuma hma lam pan mek Sinner hi Italian zingah Grand Slam-a champion hmasa ber, World No. 1 ni chunga kum khar thei hmasa berah leh ATP Finals-a champion thei hmasa ber a ni tel bawk.
BJK Cup champion Italy
