Mizoram mipuiah BJP hlauh kan inzirtir chu kan sim a ngai tih BJP MLA Dr K Beichhua chuan a sawi.
Thawhtannia an party office-a inkhawmah BJP State Core Group member ni bawk Dr K Beichhua chuan, Mizoram mipuiin hlauh tur dik tak Pathian kan hlauh a ngai a, kan do tur tak sual pawh kan hriat a ngai, tiin, “BJP hlauh kan inzirtir hi kan sim a ngai. Politics dik, kalphung dika kal turin Mizoram mipui inbuatsaih ang u,” a ti.
Mizorama Cyclone Remal vanga chhiatna thlengah BJP Mizoram president nen inrawnin, BJP Legislature Party leader a nih angin Prime minister Narendra Modi hnenah Mizoram tanpuina atan cheng vaibelchhe 1000 dilna ziaka a thehluh bakah Union Home minister Amit Shah, Mizoram chief minister Lalduhoma, BJP State president Vanlalhmuaka te hnenah a copy a pek thu a sawi. PM Office pawh phone-a biain, an dilna tha takin an lo dawngsawng a, an lo bawhzui ngei tur thu an lo hrilh tih a sawi.
Union Home minister chuan June 1 khan Mizoram CM chu phone-a rawn be nghalin, chhiat tawhnaa chhawmdawl hna an rawn thawh tur thu a rawn hriattir tih BJP MLA hian a sawi a. “Heti taka kan ngenna central-in min ngaihpawimawh sak hi a lawmawm kan ti hle a, hetianga ram pum huap anga chhiatna kan tawhah chuan party sawi loa, kan ram tan pheikhai rual taka ke kan pen zel hi kan insawmna a ni,” a ti. State sawrkar lakah eng lai pawhin tih theih an nei a nih chuan BJP Mizoram chu a inhawng reng a, state sawrkar pawhin chu chu hriatsak se a duh tih a sawi bawk.
BJP hlauh inzirtir hi sim a ngai – Dr K Beichhua
