BJP chuan Assam BJP social media account-a artificial-intelligence (AI) hmanga siam video sawi hlawh tak dah chhuaktu, an social-media co-convenor Ron Vikash Gaurav-a chu an ban tih an puang.
Video hi February 7-a Assam BJP official X-a dah chhuah kha niin politic kaihhnawiha sawiselna nasa tak a awm rualin paih lehnghal a ni.
Video-ah hian Assam Chief Minister Himanta Biswa Sarma-a’n silai hmanga an state-a hnam tlem zawkte a tin lai langin a thu, caption-ah ‘point-blank shot’ tih dah tel a ni tih Assam Pradesh Congress Committee (APCC)-in police hnena complaint an theh luhah chuan tar lan a ni.
Dispur Police Station-ah Congress MLA pahnih, Sibamoni Bora leh Diganta Barman chuan FIR thehlutin video dah chhuah chu ‘a tha lo zawnga mi chawk tho thei leh chi leh chi inkar boruak tha lo thlen thei’ niin an sawi a, khawtlanga inlungrualna tichhe thei niin an sawi bawk.
Complaint thehluhah hian video-a a lan dan chuan Sarma-a hian Muslim mite a kap lai lantir a nih thu tar lan niin a thu inziak awmah chuan’foreigner free Assam’ tih leh ‘Why did you not go to Pakistan?’ tih a awm bawk niin an tar lang.
BJP chuan a clip hi eptu party-te atanga nasa taka sawiselna a awm hnuah an official account atang hian an paih zui a. Sawi neuh neuh awm zui zelin party chuan video dah chhuaktu, Gaurav-a chu a nihna atangin an chawlhtir zui ta a ni.
Video dah chhuah hi dan hmanga khingtu an tam hle a. APCC-in FIR an thehluh hi Assam leh state pawn thlenga hekna lut zinga pakhat chauh a ni zawk a, eptu hruaitute chuan hetiang mi inthleina leh a tha lo zawnga mi rilru chawk tho thei hian thil tak tak a entir niin an sawi bawk.
All India Majlis-e-Ittehadul Muslimeen (AIMIM) chief Asaduddin Owaisi-a pawhin Hyderabad-ah Sarma-a lakah complaint a thehlut a, ‘genocidal hate speech’ tia sawiin dan anga hmalakna a phut.
Assam chief minister erawh chuan he video siam leh dah chhuahah hian engmah a hriatpui loh thu a sawi a. Sarma-a hian Congress hruaitute lakah he video kaihhnawih kal zela an tihhmingchhiat manah Rs vaibelchhe 500 chawi turin a ti let ve bawk.
BJP-in AI-a siam Assam CM video dah chhuaktu bântir
